यो साँच्चै नै ऐतिहासिक क्षण हो।

हामी आज यहाँ, यो ऐतिहासिक महाधिवेशनको अवसरमा उपस्थित भएका छौं। महामन्त्री, युवा नेता तथा भविष्यका तारा गगनकुमार थापा र अर्का महामन्त्री विश्वप्रकाश शर्मा ज्यूले जुन किसिमको ऐतिहासिक विशेष महाधिवेशनको आयोजना गर्नुभएको छ, आज त्यसको उद्घाटन भइरहेको छ। म यो महाधिवेशनको पूर्ण सफलताको कामना गर्दछु।

बिरामी हुँदाहुँदै पनि तपाईंहरुको सामुन्ने आएको छु। सारा साथीहरु, पुराना साथीहरू-तारानाथ रानाभाट, ओमकार श्रेष्ठजी, अर्जुननरसिंह केसीजी, महेश आचार्यजी लगायतका साथीहरूको उपस्थिति देखेर मलाई अत्यन्त खुसी लागेको छ।

सम्पूर्ण केन्द्रीय सदस्य साथीहरू, मुलुकभरीबाट पाल्नुभएका महाधिवेशन प्रतिनिधिहरू, सहभागी साथीहरू, सभापतिज्यूहरू तथा केन्द्रीय सदस्यहरू- जो यहाँ उपस्थित हुनुहुन्छ, वहाँहरुलाई म सम्बोधन गर्न चाहन्छु।

साथीहरू,

म तपाईंहरुसँग धेरै कुरा भन्न गइरहेको छैन।

२०१२ सालमा सुवर्ण शमशेरले विशेष महाधिवेशन गर्नुभएको थियो। आज त्यसको करिब ७० वर्षपछि फेरि यो ऐतिहासिक विशेष महाधिवेशन हुन गइरहेको छ। यहाँ कसैले हठ गरिराख्नु हुँदैन। विधि र विधान अनुसार अगाडि बढ्न दिनुपर्छ। विधी र विधानअनुसार चल्नुपर्छ। विशेष महाधिवेशन गरेको निर्णयलाई कार्यान्वयन गर्नुपर्छ भन्ने मेरो मान्यता छ।

साथीहरू,

आज म यहाँ कुनै पद माग्न उभिएको होइन। आज म ७८ वर्षको व्यक्ति हुँ। मैले ७० वर्ष यो पार्टीमा रगत र पसिना बगाएको छु। न त कुनै व्यक्तिगत स्वार्थको पोको बोकेर आएको छु। आज यो ऐतिहासिक मञ्चबाट हाम्रो गौरवशाली पार्टी नेपाली कांग्रेस र यस देशको अस्तित्वका बारेमा बोल्न आएको छु।

स्थिति अत्यन्त जटिल छ। भाद्र २३ र २४ ले के देखाको छ? अब पार्टीभन्दा माथि उठेर गुटको कुरै नगर्नुस्। पार्टीभन्दा माथि उठेर राष्ट्रियता जोगाउन हामी एकजुट हुनुपर्छ। आज मुलुकको राष्ट्रियता खतरामा छ।

२०३३ सालमा बीपी कोइरालाले राष्ट्रिय एकता र मेलमिलापको नीति लिएर आउनुभएको थियो। त्यही अवस्था अहिले पनि छ। दक्षिण एशियाको हाम्रो आकाशमा कालो बादल मडारिएको छ। देशै रहेन भने हामी को सिट शासन गर्ने?

हामीले गर्वको साथ भन्छौँ- नेपाली कांग्रेसले राणा फाल्यो, पञ्चायत ढाल्यो र देशमा गणतन्त्र ल्यायो। तर साथीहरू, इतिहासको ब्याज मात्र खाएर अब भविष्य चल्दैन। भविष्यतर्फ पनि अघि बढ्नुपर्छ।

समय बदलिएको छ। पुस्ता बदलिएको छ। जनताका अपेक्षाहरू बदलिएका छन्। त्यसैले अब हाम्रो पार्टी चल्ने शैली पनि बदलिनुपर्छ। अब नयाँ युवाहरुलाई अगाडि सार्नुपर्छ। नयाँ युवा-युवतीलाई देशको हरेक क्षेत्रमा ल्याउनुपर्छ।  र उहाँहरुलाई उठाउनुपर्छ, जिताउनुपर्छ। 

हामीलाई व्यक्तिगत रूपमा मैले केही नपाएको भए पनि त्यसले कुनै फरक पर्दैन। तर यहाँ पार्टी मजबुत हुनुपर्छ। यदि नेपाली कांग्रेस कमजोर भयो भने देशको लोकतन्त्र पनि कमजोर हुन्छ। त्यसैले पार्टीको हितका लागि हामी जस्तोसुकै त्याग गर्न तयार हुनुपर्छ। 

मित्रहरू, 

मैले इतिहासका धेरै उथलपुथलहरु देखेको छु। धेरै अनुभवहरु गरेको छु। 

र, मित्रहरु- यो विशेष महाधिवेशनको पूर्ण सफलताको कामना गर्दै फेरि भेट हुने विश्वासका साथ आजका लागि विदा हुन्छु।

धन्यवाद। जय नेपाल।