काठमाडौं। प्रधानमन्त्री बालेन्द्र शाह ‘बालेन’ले सुनसरीमा भएको हिंसात्मक घटनाप्रति गहिरो दुःख व्यक्त गर्दै दोषीमाथि कानुनबमोजिम कारबाही हुने र पीडित परिवारलाई न्याय तथा क्षतिपूर्ति उपलब्ध गराइने प्रतिबद्धता व्यक्त गरेका छन्।

राष्ट्रका नाममा सम्बोधन गर्दै प्रधानमन्त्री शाहले आफू प्रधानमन्त्रीका रूपमा मात्र नभई यही देशको एक नागरिकका रूपमा पनि घटनाबाट अत्यन्त दुःखी भएको बताए। उनले घटनामा ज्यान गुमाएकाप्रति श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरे। साथै घाइतेहरूको शीघ्र स्वास्थ्यलाभको कामना पनि गरे।

‘प्रधानमन्त्रीकारूपमा मात्र होइन, यही देशका नागरिककारूपमा म सुनसरीमा भएका घटनाक्रमबाट दुःखी छु। मृतकप्रति हार्दिक श्रद्धाञ्जली व्यक्त गर्दछु। घाइतेहरूको चाँडो स्वास्थ्य ठिक होस् भन्ने कामना गर्दछु। सरकारले सक्दो चाँडो न्याय र क्षतिपूर्ति उपलब्ध गराउनेछ,’ प्रधानमन्त्री शाहले लेखेका छन्। 

प्रधानमन्त्री शाहले घटनाबाट प्रभावित परिवारको पीडा सरकारले महसुस गरेको उल्लेख गर्दै दोषीलाई कुनै पनि हालतमा उन्मुक्ति नदिइने स्पष्ट पारे। उनले यस्ता घटना पुनः दोहोरिन नदिन सरकारले तत्काल आवश्यक निर्णयहरू अघि बढाइरहेको जानकारी दिए।

सम्बोधनका क्रममा उनले सुरक्षाकर्मीको गोलीबाट नागरिकको ज्यान जानु र घाइते हुनु अत्यन्त गम्भीर विषय भएको उल्लेख गरे। यस घटनाबारे अनुसन्धान सुरु भइसकेको जानकारी दिँदै अनुसन्धानको निष्कर्षका आधारमा कानुनअनुसार कारबाही गरिने विश्वास व्यक्त गरे।

प्रधानमन्त्री शाहले फेसबुकमा लेखेका छन्, ‘सुरक्षाकर्मीको गोलीले नागरिकको ज्यान गुम्यो, घाइते भए। सुरक्षाकर्मीको तर्फबाट यस्तो क्षति हुनु कुनै पनि हालतमा सामान्य कुरा होइन। यसबारे अनुसन्धान सुरु भइसकेको छ र कानुनबमोजिम कारबाही हुनेछ। सरकार छ र दोषीमाथि कारबाही हुनेछ भन्ने विश्वास दिलाउन चाहन्छु।’

प्रधानमन्त्रीले सम्पूर्ण घटनाको सरकारले गम्भीर समीक्षा गरिरहेको बताउँदै भविष्यमा यस्ता घटना दोहोरिन नदिन जिम्मेवार र प्रभावकारी कदम चालिने आश्वासन दिए। मृतकका परिवार, घाइते तथा प्रभावित सबैलाई न्यायको अनुभूति गराउन सरकारले आफ्नो सम्पूर्ण शक्ति प्रयोग गर्ने उनको भनाइ थियो।

सम्बोधनको अन्त्यमा प्रधानमन्त्री शाहले नागरिकलाई संयम अपनाउन आग्रह गर्दै आक्रोश, बदलाको भावना र उत्तेजनाबाट टाढा रहन अपिल गरे। उनले सामाजिक सद्भाव, आपसी प्रेम, सम्मान र सहिष्णुता कायम राख्न सबैलाई आग्रह गर्दै मानवताको रक्षा नै सबैभन्दा ठूलो धर्म भएको उल्लेख गरे। उनका अनुसार सरकारको पहिलो दायित्व नागरिकको सुरक्षा सुनिश्चित गर्नु, दोषीलाई कानुनी दायरामा ल्याउनु र पीडितलाई न्याय दिलाउनु हो।