काठमाडौं। गृह मन्त्रालयअन्तर्गतको अध्यागमन विभागले आगामी भदौ १ गतेदेखि इलेक्ट्रोनिक भिसा (ई–भिसा) प्रणाली पूर्ण रूपमा कार्यान्वयनमा ल्याउने भएको छ।

विभागले प्रणाली सञ्चालनका लागि आवश्यक सम्पूर्ण प्राविधिक तथा प्रशासनिक तयारी पूरा भएको जनाएको छ।

अध्यागमन विभागका प्रवक्ता तथा निर्देशक टीकाराम ढकालका अनुसार ई–भिसा लागू भएपछि नेपाल आउने विदेशी नागरिकले अब आफ्नो पासपोर्टमा भिसा स्टीकर टाँस्नुपर्ने व्यवस्था अन्त्य हुनेछ।

नयाँ व्यवस्थाअनुसार पर्यटक तथा अन्य विदेशी नागरिकले आफ्नै देशबाट अनलाइनमार्फत भिसाका लागि आवेदन दिन सक्नेछन्। आवेदन स्वीकृत भएपछि उनीहरूले ई–भिसा अनलाइनमै प्राप्त गर्नेछन् र त्यसको प्रिन्ट वा डिजिटल प्रतिका आधारमा नेपाल प्रवेश गर्न सक्नेछन्।

ढकालका अनुसार ई–भिसा प्रणाली भदौ १ गतेदेखि नेपाल आउने सबै देशका नागरिकका लागि लागू हुनेछ। यसबाट भिसा प्रक्रियालाई छिटो, सहज, पारदर्शी र प्रविधिमैत्री बनाउने सरकारको अपेक्षा रहेको छ।

ई–भिसा प्रणाली कार्यान्वयनसँगै अध्यागमन सेवामा कागजी प्रक्रिया घट्ने, सेवा प्रवाहमा सहजता आउने र अन्तर्राष्ट्रिय यात्रुलाई थप सुविधा पुग्ने विश्वास विभागले लिएको छ।