काठमाडौं । प्रमुख प्रतिपक्षी दल नेपाली कांग्रेसले सुनसरीको देवानगञ्‍ज गाउँपालिका-३, कप्तानगञ्‍जमा भएको हिंसात्मक घटनापछि गृहमन्त्री सुधन गुरुङको मौनतामाथि प्रश्‍न उठाएको छ।

सामान्य घटनामा समेत भावुक अभिव्यक्ति दिने गृहमन्त्री गुरुङ यति गम्भीर घटनामा सार्वजनिक रूपमा नबोलेको भन्दै कांग्रेस प्रमुख सचेतक बासना थापाले सरकारको नेतृत्वमाथि प्रश्‍न गरेकी हुन् ।

प्रतिनिधिसभाको बिहीबारको बैठकमा थापाले एक जनाको मृत्यु, दर्जनौँ नागरिक घाइते र नेपाली सेना परिचालन गर्नुपर्ने अवस्था आउँदासमेत प्रधानमन्त्री बालेन र गृहमन्त्री गुरुङ जिम्मेवार नदेखिएको आरोप लगाइन्।

उनले गृहमन्त्रीलाई लक्षित गर्दै भनिन्, ‘कुरा-कुरामा आँसु झार्ने गृहमन्त्री पनि आज मौन बस्‍नु आश्‍चर्यजनक छ। यति गम्भीर घटनामा प्रधानमन्त्री पनि मौन हुनुहुन्छ।’

थापाले सरकारले शान्ति सुरक्षा कायम गर्न नसकेको दाबी गर्दै नागरिकको जीउधनको सुरक्षा गर्नु सरकारको पहिलो दायित्व भएको उल्लेख गरिन्।

उनका अनुसार यति ठूलो घटना हुँदा पनि सरकारबाट स्पष्ट धारणा, जिम्मेवारी स्वीकार वा प्रभावकारी कदम नदेखिनु गम्भीर विषय हो।

उनले कप्तानगञ्‍ज घटनामा ओमप्रकाश गुप्ताको मृत्यु भएको र दर्जनौँ नागरिक घाइते भएको उल्लेख गर्दै यसको पूर्ण जिम्मेवारी सरकारले लिनुपर्ने माग गरिन्।

‘यत्रो ठूलो घटना हुँदा, एक जना नागरिकको ज्यान जाँदा र दर्जनौँ घाइते हुँदा पनि सरकार लाचार बनेको छ। यो घटनाको जवाफ सरकारले दिनुपर्छ र यसको पूर्ण जिम्मेवारी लिनुपर्छ,’ उनले भनिन्।

कांग्रेसले घटनाको निष्पक्ष छानबिन गरी दोषीलाई तत्काल कानुनी दायरामा ल्याउन, पीडित परिवारलाई उचित क्षतिपूर्ति दिन तथा साम्प्रदायिक सद्‍भाव कायम गर्न प्रभावकारी सुरक्षा रणनीति अवलम्बन गर्न सरकारसँग माग गरेको छ।

सुनसरीको कप्तानगञ्‍जमा भएको हिंसापछि एक जनाको मृत्यु, दुई दर्जनभन्दा बढी घाइते तथा स्थानीय प्रशासनले कर्फ्यु जारी गरेपछि अवस्था नियन्त्रणमा लिन नेपाली सेना समेत परिचालन गरिएको थियो।

विपक्षी दलले यस्ता गम्भीर घटनामा सरकारको राजनीतिक र नैतिक जिम्मेवारी रहेको भन्दै प्रधानमन्त्री र गृहमन्त्रीको सार्वजनिक जवाफ माग गरेको छ।