काठमाडौं। प्रधानमन्त्री बालेन शाहको आह्वानमा राष्ट्रिय सुरक्षा परिषद्को बैठक सिंहदरबारस्थित प्रधानमन्त्री तथा मन्त्रिपरिषद्को कार्यालयमा सुरु भएको छ।

परिषद्का अध्यक्षसमेत रहेका प्रधानमन्त्री शाहको नेतृत्वमा बसेको बैठकमा सुनसरीको कप्तानगञ्जमा भएको घटनासहित देशको समग्र शान्ति–सुरक्षा अवस्थाबारे छलफल भइरहेको छ।

बैठकमा प्रधानमन्त्री, रक्षामन्त्री, गृहमन्त्री, परराष्ट्रमन्त्री, अर्थमन्त्री, मुख्य सचिव र नेपाली सेनाका प्रधानसेनापतिको सहभागिता रहने व्यवस्था छ। रक्षा सचिवले परिषद्को सदस्य सचिवका रूपमा काम गर्छन्।

राष्ट्रिय सुरक्षा परिषद्ले मुलुकको समग्र राष्ट्रिय हित, सुरक्षा तथा प्रतिरक्षासम्बन्धी विषयमा सरकारलाई राय–सल्लाह दिने तथा आवश्यक नीति र कार्ययोजना तयार गर्न भूमिका खेल्छ।

त्यस्तै, नेपाली सेनाको परिचालन वा नियन्त्रणका सम्बन्धमा सरकारलाई सिफारिस गर्ने, सेनाको सुदृढीकरण तथा आधुनिकीकरणका लागि योजना बनाउने र सुरक्षा निकायका लागि आवश्यक हातहतियार तथा उपकरणसम्बन्धी नीति तर्जुमा गर्ने जिम्मेवारी पनि परिषद्को हो।