काठमाडौं। नेपाली कांग्रेसका सांसद अर्जुननरसिंह केसीले प्रधानमन्त्री बालेन्द्र शाह (बालेन) ले प्रतिनिधिसभालाई उपेक्षा गरेको आरोप लगाएका छन्।

प्रतिनिधिसभाको बैठकमा बोल्दै केसीले पछिल्लो सात दिनमा प्रधानमन्त्रीको संसद् उपस्थितिलाई लिएर प्रश्न उठाएका हुन्। उनका अनुसार प्रधानमन्त्री अहिलेसम्म करिब २ देखि ३ घण्टा मात्रै संसद्मा उपस्थित भएका छन्।

सांसद केसीले प्रधानमन्त्रीसँग स्पष्टीकरण माग भइरहे पनि त्यसको जवाफ नदिइएको भन्दै सरकारको कार्यशैलीप्रति असन्तुष्टि जनाए।

‘स्पष्टीकरणको माग निरन्तर उठ्दा भ्रमको उपेक्षाले संसद्को चरम अपमान भएको छ,’ उनले भने, ‘अत्यधिक बहुमत र ठूलो आशा, भरोसासाथ बहुमतमा आएको सरकारको नयाँपन भनेको संसदीय प्रक्रियाबाट होइन, फेसबुक स्टाटसबाट चल्ने हो ? यो बारेमा अहिले आम जनता पनि जान्न चाहन्छन्।’

उनले मुलुकमा नागरिकप्रतिको राज्यको उपेक्षा बढ्दै गएको दाबी गरे। आत्मदाह र आत्महत्याका घटना, सुनसरीको कप्तानगञ्जमा भएको गोलीकाण्ड तथा त्यसपछि सेना परिचालनको अवस्थाले सामाजिक एकता र सद्भावमा गम्भीर चुनौती थपिएको उनको भनाइ थियो।

केसीले धर्म, सम्प्रदाय र संस्कृतिबीच कायम रहेको एकता तथा विशिष्टता जोगाउन सरकार गम्भीर हुनुपर्ने बताए।

उनले सुकुम्बासीका समस्या, लघुवित्त पीडितको अवस्था, बढ्दो महँगी तथा आर्थिक मन्दीका कारण सर्वसाधारणको जनजीवन थप कष्टकर बन्दै गएको पनि संसद्मा बताए।