काठमाडौं। नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले सुनसरीको कप्तानगञ्ज घटनामा गोली चलाउनुपर्ने अवस्था थियो कि थिएन भन्ने विषयमा गम्भीर छानबिन गर्न माग गरेका छन्।

प्रतिनिधिसभाको बैठकमा बोल्दै प्रचण्डले बोलबम धार्मिक यात्राका क्रममा उत्पन्न विवाद हिंसात्मक घटनामा परिणत भएको भन्दै घटनाको सत्यतथ्य बाहिर ल्याउनुपर्ने बताए।

उनले घटनाले साम्प्रदायिक विद्वेषको रूप लिन सक्ने चिन्ता बढेको भन्दै सुरक्षा निकायको भूमिकामाथि समेत प्रश्न उठाए।

‘सुनसरीको कप्तानगञ्जमा बोलबमको धार्मिक यात्राका सन्दर्भमा उत्पन्न विवाद चर्किएर दुःखद घटनासम्म पुग्यो। यसले कतै ठूलो साम्प्रदायिक विद्वेषको रूप लिने त होइन भन्ने चिन्ता सर्वत्र व्यक्त भइराखेको छ,’ उनले भने।

घटनाका क्रममा सुरक्षा निकायले निर्वाह गरेको भूमिका र बल प्रयोगको आवश्यकताबारे प्रचण्डले प्रश्न गरे।

‘यो घटना प्रक्रियामा सुरक्षा निकायको भूमिका के कस्तो रह्यो ? के त्यहाँ त्यो स्तरको गोली चलाउनै पर्ने अवस्था थियो या थिएन ?’ उनले प्रश्न गरे।

प्रचण्डले घटनाको सम्पूर्ण प्रक्रियाबारे विस्तृत अध्ययन गरी वास्तविकता सार्वजनिक गर्न सरकारसँग माग गरे। उनले घटनालाई केवल सुरक्षा चुनौतीका रूपमा नभई सामाजिक सद्भाव र साम्प्रदायिक संवेदनशीलतासँग जोडेर हेर्नुपर्नेमा समेत जोड दिए।