काठमाडौं। नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले राष्ट्रिय स्वतन्त्र पार्टी (रास्वपा)लाई दुई तिहाइ बहुमतको दम्भ नपाल्न चेतावनी दिएका छन्।

प्रतिनिधिसभाको बैठकमा बोल्दै प्रचण्डले सरकारप्रति जनतामा असन्तुष्टि बढ्दै गएको दाबी गरे। उनले प्रधानमन्त्री बालेन्द्र शाह (बालेन)लाई प्रतिपक्षी दलहरूसँग संवादमा आउन आग्रह गरे।

प्रतिपक्षसँग संवाद गर्दैमा प्रधानमन्त्रीको कद सानो नहुने भन्दै प्रचण्डले सरकारलाई राजनीतिक अनुभव भएका नेता, विज्ञ तथा विभिन्न क्षेत्रका व्यक्तिसँग छलफल गर्न सुझाव दिए।

‘उनीहरूसँग संवाद गर्न प्रधानमन्त्रीलाई के ले रोकेको होला ? मलाई अनौठो लाग्छ,’ प्रचण्डले भने।

नेपालको राजनीतिक इतिहासमा लामो समय संघर्ष गरेका तथा जटिल परिस्थितिमा निकास दिन सक्ने क्षमता भएका नेताहरूको अनुभव सरकारका लागि उपयोगी हुन सक्ने उनको भनाइ थियो।

प्रचण्डले प्रधानमन्त्री शाहले आफूसँग समेत संवाद गरेर विगतमा भ्रष्टाचारविरुद्ध अघि बढ्ने क्रममा देखिएका समस्या र अवरोधबारे छलफल गर्न सक्ने बताए।

‘उहाँले मलाई बोलाएर एकचोटी तपाईंले पनि भ्रष्टाचारको विरुद्ध लड्छु भनेर सुरु त गर्नुभएको थियो। के ले तपाईंलाई सफल हुन दिएन ? भनेर सोधे पनि त हुन्थ्यो,’ उनले भने।

प्रधानमन्त्रीलाई संवादबाट रोक्ने कारण अहंकार वा आफू मात्र पर्याप्त छु भन्ने सोच हुनसक्ने भन्दै प्रचण्डले त्यस्तो अवस्था भए दुर्भाग्यपूर्ण हुने टिप्पणी गरे।

‘आफ्नै अहंकारले रोक्या हो कि ? म पर्याप्त छु, अब मलाई कोही चाहिँदैन भन्ने खालको हो कि ? यदि त्यसो हो भने त्यो दुर्भाग्यपूर्ण हो,’ उनले भने।