काठमाडौं। नेपाली कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ले प्रधानमन्त्री वालेन्द्र शाहको कार्यशैलीमाथि गम्भीर प्रश्न उठाएका छन् ।

प्रतिनिधिसभाको बिहीबारको बैठकमा बोल्दै उनले प्रधानमन्त्री शाहले प्रतिपक्षी दल तथा अनुभवी नेताहरूसँग संवाद नगर्ने शैली अपनाएको भन्दै त्यसले मुलुकलाई थप जटिलतातर्फ धकेल्न सक्ने चेतावनी दिए ।

प्रचण्डले प्रधानमन्त्रीको मौनता र एकल निर्णय गर्ने प्रवृत्तिलाई लोकतान्त्रिक अभ्याससँग जोडेर प्रश्न गरेका हुन् । उनका अनुसार सरकारसँग ठूलो जनमत भए पनि त्यसको अर्थ संसद्, प्रतिपक्ष र राजनीतिक नेतृत्वसँग संवादको आवश्यकता समाप्त हुनु होइन ।

उनले प्रधानमन्त्री शाहलाई संसद्मा उपस्थित भएर पछिल्ला घटनाक्रमबारे जवाफ दिन आग्रह गरे । प्रधानमन्त्री संसद्मा आएर आफ्नो धारणा राख्दा उनको राजनीतिक उचाइ घट्ने नभई बढ्ने प्रचण्डको तर्क थियो । त्यसका लागि सभामुख डीपी अर्यालले समेत पहल गर्नुपर्ने उनले बताए ।

प्रचण्डले अहिलेको राजनीतिक परिस्थितिमा संवादलाई विकल्पहीन उपायका रूपमा प्रस्तुत गरे । नेपालमा लामो राजनीतिक संघर्ष र संकटको अनुभव बोकेका नेता, बुद्धिजीवी तथा विज्ञहरूको ठूलो पंक्ति रहेको भन्दै उनले त्यस्ता व्यक्तिसँग परामर्श लिन प्रधानमन्त्री शाहलाई आग्रह गरे ।

उनले आफूलाई समेत बोलाएर छलफल गर्न सकिने बताए । विगतमा भ्रष्टाचारविरुद्ध अभियान चलाएको अनुभव आफूले प्रधानमन्त्रीसँग बाँड्न सक्ने उनको भनाइ थियो ।

प्रधानमन्त्री शाहको कार्यशैलीप्रति टिप्पणी गर्दै प्रचण्डले उनको आत्मविश्वास अहंकारमा परिणत हुन नहुने संकेत गरे । ‘म नै पर्याप्त छु’ भन्ने मानसिकताले सरकार सञ्चालन गर्दा त्यसको असर प्रधानमन्त्रीमा मात्र नभई सिंगो मुलुकमा पर्न सक्ने उनको चेतावनी थियो ।

रास्वपा सभापति रवि लामिछानेले अघि बढाएको संवाद र सहकार्यको प्रयासको भने प्रचण्डले स्वागत गरे । उनले सरकार र प्रतिपक्षबीचको दूरी घटाउन संवादको वातावरण बनाउनुपर्ने बताए ।

प्रचण्डको पछिल्लो अभिव्यक्तिको मूल सन्देश सत्ता कसले चलाइरहेको छ भन्नेभन्दा पनि सत्ता कसरी चलाइँदैछ भन्ने प्रश्नमा केन्द्रित देखिन्छ । ठूलो बहुमत र जनसमर्थन सरकारका लागि बलियो आधार भए पनि लोकतान्त्रिक शासनमा त्यससँगै जवाफदेहिता, संवाद र संसद्प्रतिको उत्तरदायित्व पनि उत्तिकै आवश्यक हुने उनको तर्क छ ।