काठमाडौं। कप्तानगञ्ज घटनालाई लिएर प्रदर्शन चर्किएपछि सुरक्षा अवस्था बिग्रन सक्ने भन्दै सिरहाको लहान क्षेत्रमा अनिश्चितकालीन कर्फ्यु आदेश जारी गरिएको छ।

जिल्ला प्रशासन कार्यालय सिरहाले बिहीबार दिउँसो ४ बजेदेखि लागू हुने गरी अर्को आदेश नभएसम्मका लागि कर्फ्यु लगाएको हो। पछिल्लो सुरक्षा अवस्थाको विश्लेषण तथा जिल्ला सुरक्षा समितिको निर्णयका आधारमा प्रमुख जिल्ला अधिकारी सुरेन्द्र पौडेलले स्थानीय प्रशासन ऐन, २०२८ को दफा ६(क) बमोजिम आदेश जारी गरेका हुन्।

प्रशासनका अनुसार पूर्व–पश्चिम राजमार्गअन्तर्गत लहान नगरपालिकाको पूर्वमा बलान खोला, पश्चिममा सरस्वती खोला (बाटिका होटल पश्चिम) र दक्षिणतर्फ पूर्व–पश्चिम राजमार्गको ५०० मिटर आसपासको क्षेत्रमा कर्फ्यु लागू गरिएको छ।

कर्फ्यु अवधिमा उक्त क्षेत्रमा आवतजावत, भेला, प्रदर्शन, सभा, बैठक, घेराउ तथा नाराबाजी गर्न पूर्ण रूपमा प्रतिबन्ध लगाइएको छ।

जिल्ला प्रशासन कार्यालयले कर्फ्यु आदेश उल्लङ्घन गरी निषेधित गतिविधि गर्ने व्यक्तिलाई सुरक्षाकर्मीले चेतावनी दिन सक्ने र स्थिति नियन्त्रणमा लिन आवश्यक परे गोलीसमेत चलाउन सक्ने जनाएको छ।