काठमाडौं । सिरहामा प्रदर्शन चर्किँदै गएपछि जिल्लाको सुरक्षा अवस्था तनावग्रस्त बनेको छ। बिहीबार बिहानदेखि प्रदर्शनले उग्र रूप लिएसँगै विभिन्न स्थानमा आगजनी र तोडफोडका घटना बढेका छन्।

सुरक्षा अवस्था बिग्रिएपछि जिल्ला प्रशासनले जिल्लाका संवेदनशील क्षेत्रमा कर्फ्यु आदेशसमेत जारी गरेको छ। तर कर्फ्युका बीच पनि केही स्थानमा प्रदर्शन र तोडफोडका घटना रोकिएका छैनन्।

यसै क्रममा गोलबजारमा रहेको सिरहा सुपरमार्केटद्वारा सञ्चालित एबी मलमा आगजनी गरिएको छ। आगजनीपछि क्षेत्रमा थप तनाव बढेको छ।

घटनापछि प्रहरीले अवस्था नियन्त्रणमा लिन सुरक्षा परिचालन बढाएको छ। प्रदर्शनकारी र सुरक्षाकर्मीबीच थप झडप हुन नदिन प्रहरीले स्थिति नियन्त्रणमा लिने प्रयास गरिरहेको जनाएको छ।

कप्तानगञ्ज घटनालाई लिएर सुरु भएको प्रदर्शन विभिन्न क्षेत्रमा फैलिँदै गएपछि सिरहाको सुरक्षा अवस्था थप संवेदनशील बनेको हो।