काठमाडौं। सिरहाको गोलबजारमा भएको प्रदर्शनका क्रममा गोली चल्दा एक जनाको मृत्यु भएको छ भने अर्का एक जना गम्भीर घाइते भएका छन्। तर गोली कसले चलाएको हो भन्ने विषय अझै स्पष्ट हुन सकेको छैन।

सिरहाका सहायक प्रमुख जिल्ला अधिकारी चेतराज अधिकारीले घटनामा गोली कसले चलाएको भन्ने पुष्टि भइनसकेको बताएका छन्। उनका अनुसार घटनाको प्रकृति र गोली चलेको अवस्थाबारे सुरक्षा निकायले विस्तृत अनुसन्धान गरिरहेको छ।

‘गोली कसले चलाएको हो भन्ने विषय अहिले नै पुष्टि भएको छैन। घटनाका सबै पक्षबारे अनुसन्धान भइरहेको छ,’ अधिकारीले भने।

गोलबजार क्षेत्रमा प्रदर्शन चर्किएपछि स्थानीय प्रशासनले सुरक्षा व्यवस्था थप कडा बनाएको छ। स्थिति नियन्त्रणमा लिन नेपाल प्रहरी, सशस्त्र प्रहरी बल र नेपाली सेना परिचालन गरिएको प्रशासनले जनाएको छ।