सिरहा। सिरहाको गोलबजारमा बिहीबार बिहानदेखि सुरु भएको दुई समूहबीचको झडप उग्र बन्दै गएपछि तनाव थप बढेको छ ।

स्थिति नियन्त्रणमा लिन जिल्ला प्रशासनले दिउँसोदेखि गोलबजार क्षेत्रमा कर्फ्यु आदेश जारी गरेको छ । कर्फ्युका बीच पनि प्रदर्शन र आगजनीका घटना रोकिएका छैनन् ।

घटनाका क्रममा एक जनाको मृत्यु भएपछि गोलबजारको अवस्था थप तनावग्रस्त बनेको हो । मृत्युपछि प्रदर्शनकारीहरू थप आक्रोशित बनेका छन् ।

स्थिति नियन्त्रणमा लिन नेपाल प्रहरी र सशस्त्र प्रहरीसँगै नेपाली सेनासमेत सडकमा परिचालन गरिएको छ । प्रहरीले प्रदर्शन नियन्त्रण गर्न केही सेल अश्रुग्याससमेत प्रहार गरेको छ ।

तर, सुरक्षा निकायको बाक्लो उपस्थितिका बाबजुद गोलबजार क्षेत्रमा प्रदर्शन तथा आगजनी जारी रहेको जनाइएको छ ।

तनाव बढ्दै गएपछि प्रशासनले सर्वसाधारणलाई घरबाहिर ननिस्कन तथा शान्ति–सुरक्षा कायम गर्न सहयोग गर्न आग्रह गरेको छ ।