सुनसरी। सुनसरीको देवानगञ्ज गाउँपालिका-३ कप्तानगञ्जमा गोली लागेर मृत्यु भएका दुई युवाका परिवारले शव बुझ्न अस्वीकार गरेका छन्। सरकार र मृतक परिवारबीच सातबुँदे सहमति भइसके पनि परिवार तथा आफन्तले शव बुझ्न नमानेका हुन्।

गृहमन्त्री सुधन गुरुङको उपस्थितिमा भएको छलफलपछि शुक्रबार मृतकका परिवारले शव बुझ्ने र पोस्टमार्टमपछि सोही दिन अन्त्येष्टि गर्ने सहमति भएको थियो। सहमतिपत्रमा दुवै मृतकको अन्त्येष्टि शुक्रबार दिउँसो २ बजे गर्ने उल्लेख गरिएको थियो।

तर, मृतकका आफन्तले आफूहरूलाई दबाबमा सहमतिपत्रमा हस्ताक्षर गराइएको आरोप लगाउँदै शव बुझ्न अस्वीकार गरेका छन्। सहमति कार्यान्वयन हुने सुनिश्चितता नभएकाले शव नबुझेको उनीहरूको भनाइ छ।

केही स्थानीयले समेत गृहमन्त्रीको दबाबमा मृतक परिवारसँग सहमति गराइएको आरोप लगाएका छन्। स्थानीयको विरोधपछि शव बुझ्न विराटनगर पुगेका मृतक परिवारका सदस्य तथा आफन्त पुनः देवानगञ्ज फर्किएका छन्।

सुनसरीका प्रमुख जिल्ला अधिकारी ईश्वरीप्रसाद अर्यालले शव बुझ्ने विषयमा केही समस्या देखिएको जानकारी दिएका छन्। प्रहरीले मृतक परिवारसँग समन्वय गरेर समस्या समाधानको प्रयास गरिरहेको उनले बताए।

गत आइतबार राति देवानगञ्ज गाउँपालिका-३ कप्तानगञ्जमा दुई समुदायबीच भएको विवादका क्रममा सशस्त्र प्रहरीले गोली चलाउँदा स्थानीय ओमप्रकाश मेहताको घटनास्थलमै मृत्यु भएको थियो। गोली लागेर घाइते भएका जयप्रकाश मेहताको भने उपचारका क्रममा बिहीबार मृत्यु भएको थियो।

दुवै मृतकको शव हाल विराटनगरस्थित न्युरो अस्पतालको शवगृहमा राखिएको छ। परिवारले शव बुझ्न अस्वीकार गरेपछि पोस्टमार्टम प्रक्रिया समेत अघि बढ्न सकेको छैन।

गृहमन्त्री गुरुङको उपस्थितिमा देवानगञ्ज गाउँपालिकाको कार्यालयमा भएको छलफलपछि सरकार र मृतक परिवारबीच सातबुँदे सहमति भएको थियो। सहमतिपत्रमा गृहमन्त्री गुरुङले हस्ताक्षर गरेका थिए।

सहमति पत्र लिएर गृहमन्त्री गुरुङ स्वयं मृतक परिवारको घरमा पुगेर हस्ताक्षर गराएका थिए। तर, पछि परिवारले सहमति दबाबमा भएको भन्दै शव बुझ्न अस्वीकार गरेपछि सहमति कार्यान्वयनमा नयाँ समस्या देखिएको हो।

यसैबीच, बुधबारदेखि सुनसरीको अवस्था क्रमशः सामान्य बन्दै गएको सुरक्षा निकायले जनाएको छ। यद्यपि, सम्भावित सुरक्षा जोखिमलाई मध्यनजर गर्दै स्थानीय प्रशासनले जारी गरेको कर्फ्यु भने अझै हटाएको छैन।

सरकार र मृतक परिवारबीच भएको सहमति कार्यान्वयन तथा शवको अन्त्येष्टिका विषयमा देखिएको विवाद समाधान गर्न प्रशासन र प्रहरीले समन्वय गरिरहेको जनाएको छ।