काठमाडौं । नेपाली कांग्रेसको संस्थापन इतर समूहले आगामी राष्ट्रिय भेलालाई लक्षित गर्दै संगठनात्मक तयारी तीव्र बनाएको छ।

भेलालाई व्यवस्थित रूपमा सञ्चालन गर्न समूहले डा. शशांक कोइरालाको संयोजकत्वमा ५५१ सदस्यीय मूल आयोजक समिति गठन गरेको हो।

शनिबार पत्रकार सम्मेलनमार्फत आयोजक समिति गठन गरिएको जानकारी दिइएको हो। भेलाको तयारीका लागि मूल आयोजक समितिसहित १६ वटा छुट्टाछुट्टै समिति बनाइएको प्रचारप्रसार समिति संयोजक मीन विश्वकर्माले बताए।

इतर समूहले पार्टीभित्रका समसामयिक राजनीतिक तथा सांगठनिक विषयमा छलफल गर्न काठमाडौंमा साउन २९ देखि ३१ गतेसम्म राष्ट्रिय भेला आयोजना गर्दैछ। भेलालाई संस्थापन इतर समूहको आगामी राजनीतिक रणनीति तय गर्ने महत्वपूर्ण अवसरका रूपमा हेरिएको छ।

आयोजक समिति गठनसँगै भेलाको तयारी औपचारिक रूपमा अघि बढेको छ। भेलामा पार्टीको संगठन, नेतृत्व, कार्यशैली तथा आगामी राजनीतिक दिशाबारे छलफल हुने अपेक्षा गरिएको छ।