बुटवल । बुटवलको मैनाबगरस्थित अटोभिलेज सवारीसाधन मर्मत गर्ने प्रमुख केन्द्रका रूपमा परिचित छ। तर, यहीँ अहिले दुर्घटनामा परेर मर्मत गर्न नसकिने अवस्थामा पुगेका दर्जनौँ सवारी वर्षौंदेखि थन्किएका छन्।

अटोभिलेजको एउटा हिस्सा पुराना र प्रयोगविहीन सवारीको डम्पिङ साइटजस्तै बनेको छ।

अटोभिलेजमा एक्साभेटर, टिप्पर, ट्रक, भ्यान, ट्याक्सी र जीपलगायत ५० भन्दा बढी सवारी थन्किएका छन्। कतिपय सवारी लामो समयदेखि खुला आकाशमुनि रहेकाले जीर्ण अवस्थामा पुगेका छन्।

बुटवल अटो इन्जिनियरिङ एसोसिएसनका उद्योग उपाध्यक्ष ध्रुवराज भुसालका अनुसार थन्किएका अधिकांश सवारी बैंकको नाममा छन्। बैंकको स्वामित्वमा रहेका कारण तिनका पाटपुर्जा बिक्री गर्ने वा सवारी हटाएर नष्ट गर्ने अधिकार अटोभिलेज व्यवस्थापनसँग छैन।

अटोभिलेजमा थन्किएका सवारीको इतिहास पनि फरक–फरक छ। कतिपय दुर्घटनामा परेर मर्मत गर्न नसकिने अवस्थामा पुगेका हुन् भने कतिपय लामो समयदेखि प्रयोगविहीन छन्। अटोभिलेज निर्माणका क्रममा जग्गा सम्याउन प्रयोग गरिएको डोजरदेखि पछिल्लो समय भएको जेन–जी आन्दोलनका क्रममा क्षति पुगेका सवारीसमेत यहाँ देखिन्छन्।

बुटवलमा छरिएर रहेका अटो व्यवसायलाई व्यवस्थित गर्ने उद्देश्यले २०५७ सालमा अटोभिलेज स्थापना गरिएको थियो। बुटवल उपमहानगरपालिका–२ मैनाबगरमा रहेको यो क्षेत्रलाई देशकै पहिलो अटोभिलेजका रूपमा चिनिन्छ।

हाल अटोभिलेजमा करिब ९ सय अटो व्यवसायी आबद्ध छन्। सवारी मर्मत, पार्टपुर्जा, वर्कसप तथा अन्य प्राविधिक काममा करिब १० हजार मजदुर र प्राविधिक संलग्न रहेको एसोसिएसनको भनाइ छ।

सवारी मर्मतका लागि देशका विभिन्न ठाउँबाट आउने ग्राहकका कारण अटोभिलेज बुटवलको महत्वपूर्ण व्यावसायिक केन्द्रसमेत बनेको छ। तर, मर्मत हुन नसक्ने र स्वामित्व विवादमा रहेका सवारी वर्षौंसम्म हटाउन नसक्दा अटोभिलेजको व्यवस्थापनमा भने चुनौती थपिएको छ।

एकातिर ठूलो संख्यामा व्यवसायी र प्राविधिकले यहीँबाट रोजगारी पाइरहेका छन् भने अर्कोतर्फ प्रयोगविहीन सवारीको थुप्रोले अटोभिलेजको अर्को तस्वीर देखाउँछ।

बैंक, सवारीधनी र सम्बन्धित निकायबीच समन्वय गरी यस्ता सवारीको व्यवस्थापन गर्न नसके अटोभिलेजमा थन्किएका ‘कबाडी गाडी’को संख्या अझ बढ्ने देखिन्छ।

तस्वीरहरू: