गोरखा। अविरल वर्षापछि आएको पहिरोले गोरखा नगरपालिका–९ लक्ष्मीबजारमा तीनतले पक्की घर बगाएको छ।

लक्ष्मीबजारबाट शिखर जाने सडकखण्डअन्तर्गत दिवामार्गमा स्थानीय मानसिंह गुरुङको घर पहिरोले बगाएको हो। सडकसँगै रहेको घर पहिरिएर करिब २० मिटर तल पुगेको बताइएको छ।

पहिरो खस्दा घरमा एक जना मात्रै थिए। घरमा डेरा गरी बस्दै आएका रौतहटको कटहरिया नगरपालिका–७ का टोखान महतो सामान्य घाइते भएका छन्।

घाइते महतोको प्रदेश अस्पताल गोरखामा उपचार भइरहेको छ। अविरल वर्षाका कारण गोरखाका विभिन्न क्षेत्रमा पहिरोको जोखिम बढेको छ।