काठमाडौं । प्रधानमन्त्री बालेन शाह र गृहमन्त्री सुधन गुरुङबीच भेटवार्ता भएको छ।

प्रधानमन्त्री तथा मन्त्रिपरिषद्को कार्यालय सिंहदरबारमा भएको भेटमा तराई–मधेशको पछिल्लो सुरक्षा अवस्था र त्यहाँ भएका घटनाक्रमबारे छलफल भएको प्रधानमन्त्री कार्यालय स्रोतले जनाएको छ।

मधेशका विभिन्न क्षेत्रमा पुगेर स्थलगत रूपमा काम गरेका गृहमन्त्री गुरुङले त्यहाँको पछिल्लो अवस्थाबारे प्रधानमन्त्री शाहलाई जानकारी गराएका थिए। घटनापछि स्थिति सामान्य बन्दै गएको अवस्थाबारे पनि प्रधानमन्त्रीले गृहमन्त्रीसँग जानकारी लिएका थिए।

भेटमा आगामी दिनमा अपनाउनुपर्ने सुरक्षा रणनीतिका विषयमा समेत सामान्य छलफल भएको बताइएको छ।

गत १० साउनको राति सुनसरीको कप्तानगञ्जमा दुई समुदायबीच विवाद भएपछि झडप भएको थियो। स्थिति नियन्त्रणमा लिने क्रममा सुरक्षाकर्मीले चलाएको गोली लागेर एक जनाको घटनास्थलमै मृत्यु भएको थियो।

उक्त घटनामा घाइते भएका थप दुई जनाको उपचारका क्रममा मृत्यु भएको थियो। घटनाको प्रभाव अन्य जिल्लामा समेत देखिएपछि सिरहामा भएको प्रदर्शनका क्रममा गोली लागेर एक जनाको मृत्यु भएको थियो।

स्थिति नियन्त्रणमा लिन नेपाली सेनासमेत परिचालन गरिएको थियो। प्रधानमन्त्री र गृहमन्त्रीबीचको भेटमा यही घटनाक्रमपछि तराई–मधेशमा विकसित पछिल्लो अवस्था, सुरक्षा व्यवस्थापन र आगामी रणनीतिबारे छलफल भएको बताइएको छ।