काठमाडौं । नेपाली कांग्रेस संसदीय दलका नेता भिष्मराज आङ्देम्बेले सरकारले सुकुम्बासी तथा अव्यवस्थित बसोबासी व्यवस्थापनका नाममा मानवीय संवेदनासमेत ख्याल नगरेको आरोप लगाएका छन्।

प्रतिनिधिसभामा जरुरी सार्वजनिक महत्वको प्रस्तावमाथि धारणा राख्दै आङ्देम्बेले डोजर अभियानले घर मात्रै नभई नागरिकको भरोसा र जीवनसमेत संकटमा पारेको बताए।

उनले मनोहरा, बल्खु र थापाथलीबाट विस्थापित नागरिकको अवस्थालाई उदाहरण दिँदै योजनाविहीन विस्थापन, मानसिक तनाव, उपचार अभाव र कमजोर व्यवस्थापनका कारण नागरिकले ज्यान गुमाउने अवस्था आएको दाबी गरे।

‘डोजरले टहरा भत्काएको मात्र छैन, कसैको बाँच्ने भरोसा र परिवारको सहारा पनि खोसेको छ,’ उनले भने।

आङ्देम्बेले सरकारले सुकुम्बासी व्यवस्थापनमा देखाएको व्यवहारप्रति जिम्मेवारी लिनुपर्ने र पीडित नागरिकसँग माफी माग्नुपर्ने माग गरे।