काठमाडौं। राष्ट्रिय स्वतन्त्र पार्टी (रास्वपा)की सांसद श्रद्धा कुँवर क्षेत्रीले सुकुम्बासी समस्या कुनै एक दलको मात्रै एजेन्डा नभएको भन्दै सबै राजनीतिक दलको सहकार्य र सहमतिबाट यसको दीर्घकालीन समाधान सम्भव हुने बताएकी छन्।

प्रतिनिधिसभामा सुकुम्बासी तथा अव्यवस्थित बसोबासी सम्बन्धी जरुरी सार्वजनिक महत्त्वको प्रस्तावमाथिको छलफलमा बोल्दै सांसद क्षेत्रीले सुकुम्बासी समस्यालाई चुनावी नारामा मात्रै सीमित गर्न नहुने धारणा राखिन्।

‘के सुकुम्बासी समस्या रास्वपाको मात्रै एजेन्डा हो? के सुकुम्बासी समस्यालाई चुनावी नारा मात्रै बनाउने हो?’ उनले प्रश्न उठाइन्। 

उनले भूमि व्यवस्था, सहकारी तथा गरिबी निवारणमन्त्री प्रतिभा रावलले समस्या समाधानका लागि काम गरिरहेको उल्लेख गर्दै स्थानीय तहबाट अपेक्षित सहयोग नपाएको गुनासो गरिन्।

सांसद क्षेत्रीले विपक्षी दलहरूले संसदमा सहयोग गर्ने प्रतिबद्धता जनाए पनि उनीहरूकै नेतृत्वमा रहेका स्थानीय र प्रदेश सरकारबाट पर्याप्त सहयोग नभएको टिप्पणी गरिन्।

‘विपक्षीहरूले यहाँ सहयोग गर्छौं भन्नुहुन्छ, तर स्थानीय र प्रदेशमा उहाँहरूकै सरकार छ। त्यहाँबाट सहयोग नभएको जस्तो देखिन्छ’ उनले भनिन्।

सुकुम्बासी समस्या समाधानका लागि संघ, प्रदेश र स्थानीय तहबीच प्रभावकारी समन्वय आवश्यक रहेको उल्लेख गर्दै उनले राजनीतिक आरोप-प्रत्यारोपभन्दा साझा सहमति र सहकार्यमा जोड दिइन्।