काठमाडौं। स्वास्थ्य उपचारका क्रममा हङकङमा रहेका नेपाली कांग्रेसका पूर्वसभापति शेरबहादुर देउवा साउन २९ गतेअघि नै स्वदेश फर्किने भएका छन्।

देउवाका स्वकीय सचिव भानु देउवाले पूर्वसभापति देउवा साउन २९ गतेअघि नै नेपाल फर्किने जानकारी दिए।

यद्यपि, उनको उडान र नेपाल अवतरणको निश्चित मिति भने तय भइसकेको छैन।

‘उहाँ साउन २९ गतेअघि नै नेपाल आउनुहुन्छ। तर, फर्किने निश्चित मिति भने अझै तय भइसकेको छैन,’ भानु देउवाले भने।

पार्टीभित्र पछिल्लो समय राजनीतिक सरगर्मी बढिरहेका बेला देउवा पक्षका नेताहरूले साउन २९ गते काठमाडौंमा ‘राष्ट्रिय भेला’ आयोजना गर्ने तयारी गरिरहेका छन्। उक्त भेलालाई सम्बोधन गर्दै पार्टीभित्रको पछिल्लो राजनीतिक अवस्थाबारे धारणा राख्न र रणनीतिक मार्गदर्शन दिन देउवा त्यसअघि नै काठमाडौं फर्किन लागेको बुझिएको छ।

नियमित स्वास्थ्य उपचारका लागि हङकङ पुगेका देउवाको सम्भावित स्वदेश फिर्तीलाई कांग्रेसभित्रको आन्तरिक शक्ति सन्तुलन र आगामी राजनीतिक रणनीतिका दृष्टिले चासोका साथ हेरिएको छ।