काठमाडौं। अपराध अनुसन्धान, सूचना विश्लेषण र प्रहरी सेवामा प्रविधिको प्रयोग बढ्दै गएसँगै नेपाल प्रहरीले प्राविधिक जनशक्तिलाई प्राथमिकता दिन थालेको छ।

यही क्रममा प्राविधिकतर्फ पदोन्नति भएका १० प्रहरी अधिकृतले बिहीबार नयाँ जिम्मेवारी पाएका छन्।

नेपाल प्रहरी प्रधान कार्यालयमा आयोजित समारोहमा प्रहरी महानिरीक्षक दानबहादुर कार्कीले विभिन्न तहमा पदोन्नति भएका १० प्राविधिक प्रहरी अधिकृतलाई दर्ज्यानी चिन्ह प्रदान गरे।

प्राविधिक प्रहरी उपरीक्षकबाट वरिष्ठ उपरीक्षकमा एक जना, प्राविधिक प्रहरी नायब उपरीक्षकबाट उपरीक्षकमा चार जना, प्राविधिक प्रहरी निरीक्षकबाट नायब उपरीक्षकमा चार जना र वरिष्ठ नायब निरीक्षकबाट निरीक्षकमा एक जना पदोन्नति भएका हुन्।

दर्ज्यानी चिन्ह प्राप्त गर्नेमा प्राविधिक प्रहरी वरिष्ठ उपरीक्षक दामोदर कँडेल तथा प्राविधिक प्रहरी उपरीक्षकतर्फ अमरेन्द्रप्रसाद सिंह, रामबाबु राना, अभयकुमार झा र अनुप श्रेष्ठ छन्।

त्यसैगरी प्राविधिक प्रहरी नायब उपरीक्षकतर्फ निशा चौधरी, सञ्जिव दाहाल, रमेशकुमार साह र अञ्जनराज खरेल तथा प्राविधिक प्रहरी निरीक्षकतर्फ मिनप्रसाद खत्रीले दर्ज्यानी चिन्ह पाएका छन्।

दर्ज्यानी चिन्ह प्रदान समारोहलाई सम्बोधन गर्दै प्रहरी महानिरीक्षक कार्कीले पछिल्लो समय प्रहरीको कामकारबाहीमा प्राविधिक जनशक्तिको आवश्यकता बढ्दै गएको बताए।

उनले दैनिक प्रहरी सेवा प्रभावकारी बनाउन मात्रै नभई शान्तिसुरक्षा व्यवस्थापन, अपराध नियन्त्रण र अनुसन्धानलाई छिटो तथा प्रभावकारी बनाउन प्राविधिक समूहको भूमिका महत्वपूर्ण रहेको उल्लेख गरे।

अपराधको प्रकृति परिवर्तन हुँदै जाँदा त्यसको अनुसन्धान गर्ने प्रहरी संयन्त्र पनि प्रविधिसँगै अघि बढ्नुपर्ने अवस्था छ। डिजिटल माध्यमबाट हुने अपराधदेखि सूचना विश्लेषण र अनुसन्धानमा प्रविधिको प्रयोग बढिरहेका बेला प्रहरी संगठनभित्र दक्ष प्राविधिक जनशक्तिको भूमिका अझ महत्वपूर्ण बन्दै गएको छ।

यही बदलिँदो आवश्यकताबीच प्राविधिक प्रहरी अधिकृतहरूको पदोन्नतिलाई संगठनभित्र प्राविधिक क्षमताको विस्तारसँग जोडेर हेरिएको छ।

पदोन्नति भएका अधिकृतहरूको तर्फबाट बोल्दै प्राविधिक प्रहरी वरिष्ठ उपरीक्षक दामोदर कँडेलले नयाँ जिम्मेवारीलाई संगठन र नागरिकप्रतिको थप दायित्वका रूपमा लिने बताए।

उनले प्रहरी संगठनको गरिमा, प्रतिष्ठा र जनविश्वास उच्च राख्न इमानदार, निष्पक्ष, अनुशासित र व्यावसायिक भएर काम गर्ने प्रतिबद्धता व्यक्त गरे।

प्रविधिको क्षेत्रमा प्रहरीलाई थप सक्षम बनाउने तथा नागरिकलाई प्रभावकारी सेवा दिने गरी आफूहरूले जिम्मेवारी निर्वाह गर्ने उनको भनाइ थियो।

नेपाल प्रहरीमा प्रविधिको प्रयोग विस्तार हुँदै जाँदा प्राविधिक जनशक्तिमाथिको निर्भरता पनि बढ्दै गएको छ। यस्तो अवस्थामा पदोन्नति भएका अधिकृतबाट संगठनले परम्परागत प्रहरी सेवाभन्दा अघि बढेर प्रविधिमैत्री अपराध अनुसन्धान र सेवा प्रवाहमा थप परिणाम खोजेको देखिन्छ।

समारोहमा नेपाल प्रहरीका वरिष्ठ अधिकृत तथा प्रहरी जवानहरूको उपस्थिति थियो।