काठमाडौं। राजस्व संकलनतर्फ निरन्तर सुधार गर्दै आएको मेची भन्सार कार्यालयले आर्थिक वर्ष २०८२/८३ मा लक्ष्यको ९३.३० प्रतिशत राजस्व संकलन गरेको छ।

पछिल्ला चार आर्थिक वर्षमा कार्यालयको राजस्व लक्ष्य प्राप्ति दर ७०.२१ प्रतिशतबाट बढेर ९३.३० प्रतिशत पुगेको हो।

मेची भन्सार कार्यालयका अनुसार आर्थिक वर्ष २०८२/८३ मा रु १८ अर्ब ८८ करोड ७७ लाख ४८ हजार ३०० राजस्व संकलन गर्ने लक्ष्य राखिएको थियो। कार्यालयले सो अवधिमा रु १७ अर्ब ६७ करोड ७२ लाख ११ हजार राजस्व संकलन गरेको छ।

यो रकम अघिल्लो आर्थिक वर्षको तुलनामा करिब रु १ अर्ब ७४ करोड ६० लाख बढी हो। आर्थिक वर्ष २०८१/८२ मा कार्यालयले रु १५ अर्ब ९३ करोड ११ लाख ६६ हजार राजस्व संकलन गरेको थियो।

आर्थिक वर्ष २०८१/८२ मा मेची भन्सारलाई रु १७ अर्ब ३४ करोड ४६ लाख २५ हजार राजस्व संकलनको लक्ष्य दिइएको थियो। सो वर्ष कार्यालयले लक्ष्यको ९१.८६ प्रतिशत राजस्व संकलन गरेको थियो।

त्यसअघि आर्थिक वर्ष २०८०/८१ मा रु १८ अर्ब २५ करोड ७८ लाख ६८ हजार राजस्व संकलनको लक्ष्य तोकिएकोमा रु १४ अर्ब २३ करोड ५२ लाख ६० हजार संकलन भएको थियो। उक्त वर्ष लक्ष्य प्राप्ति दर ७८.४० प्रतिशत थियो।

आर्थिक वर्ष २०७९/८० मा भने रु २० अर्ब २४ करोड १८ लाख ३८ हजार राजस्व संकलन गर्ने लक्ष्य राखिएको थियो। सो वर्ष रु १४ अर्ब ४ करोड ५९ लाख २० हजार राजस्व संकलन भएको थियो। लक्ष्य प्राप्ति दर ७०.२१ प्रतिशतमा सीमित थियो।

चार आर्थिक वर्षको तथ्यांक हेर्दा मेची भन्सार कार्यालयको लक्ष्य प्राप्ति दरमा निरन्तर सुधार भएको देखिन्छ। २०७९/८० मा ७०.२१ प्रतिशत रहेको लक्ष्य प्राप्ति दर २०८०/८१ मा ७८.४० प्रतिशत, २०८१/८२ मा ९१.८६ प्रतिशत हुँदै २०८२/८३ मा ९३.३० प्रतिशत पुगेको छ।

वार्षिक राजस्व लक्ष्यमा भने उतारचढाव देखिए पनि वास्तविक राजस्व संकलन पछिल्ला वर्षमा निरन्तर बढ्दै गएको छ। आर्थिक वर्ष २०७९/८० मा रु १४ अर्ब ४ करोड ५९ लाख २० हजार राजस्व संकलन भएकोमा २०८२/८३ मा यो रकम बढेर रु १७ अर्ब ६७ करोड ७२ लाख ११ हजार पुगेको छ।

विसं २०१३ मा स्थापना भएको मेची भन्सार कार्यालय नेपालका प्रमुख तथा रणनीतिक महत्वका भन्सार कार्यालयमध्ये एक हो। कार्यालयका सूचना अधिकारी मांकल राईका अनुसार कार्यालय मातहत रहेका छ वटा छोटी भन्सार कार्यालयमध्ये हाल गौरीगञ्ज छोटी भन्सार कार्यालय मात्र सञ्चालनमा छ। अन्य छोटी भन्सार कार्यालय सञ्चालनमा छैनन्।

मेची भन्सार कार्यालयबाट भारतसँगै चीन, बंगलादेश, भुटानलगायत मुलुकसँग निकासी-पैठारी हुँदै आएको छ।

व्यापारिक गतिविधि तथा आयात–निर्यातसँगै भन्सार राजस्व संकलनमा समेत कार्यालयको महत्वपूर्ण भूमिका रहँदै आएको छ।