काठमाडौं। नेपाल कम्युनिष्ट पार्टी (बहुमत) का केन्द्रीय सचिवालय सदस्य तथा ब्युरो नम्बर ५ का इन्चार्ज तिलक पुन मगर पक्राउ परेका छन्। उनलाई बिहीबार राति दाङबाट पक्राउ गरिएको हो।

पार्टीका प्रवक्ता उदय चलाउनेले शुक्रबार जारी गरेको विज्ञप्तिमा पुनलाई घरमै बसिरहेको अवस्थामा नेपाल प्रहरीले पक्राउ पुर्जीबिनै पक्राउ गरेको दाबी गरिएको छ। पार्टीले घटनाप्रति आपत्ति जनाउँदै पक्राउको विरोध गरेको छ।

विज्ञप्तिमा नेपाल कम्युनिष्ट पार्टी (बहुमत) ले वैज्ञानिक समाजवाद स्थापना गर्ने उद्देश्यसहित संगठन विस्तार तथा विभिन्न राजनीतिक गतिविधि सञ्चालन गरिरहेको उल्लेख गरेको छ। पार्टीले आफ्ना जिम्मेवार नेताको पक्राउ नागरिकको मौलिक हक तथा संविधानको भावनाविपरीत भएको दाबी गरेको छ।

पार्टीले पुनलाई तत्काल ससम्मान रिहा गर्न माग गरेको छ। माग पूरा नभए सशक्त आन्दोलनमा उत्रिने चेतावनीसमेत दिएको छ।

पुनलाई कुन मुद्दामा पक्राउ गरिएको हो भन्नेबारे भने प्रहरीले सार्वजनिक रूपमा विस्तृत जानकारी दिएको छैन।