काठमाडौं। नेपाली कांग्रेसभित्रको संस्थापन इतर समूहले साउन २८ गते आयोजना गर्न लागेको भेलामा पार्टीका पूर्वसभापति शेरबहादुर देउवा पनि सहभागी हुने भएका छन्।

कांग्रेस नेता डा. प्रकाशशरण महतका अनुसार देउवा साउन २६ गते हङकङबाट नेपाल फर्कने कार्यक्रम छ। त्यसपछि दुई दिनपछि हुने भेलामा उनी सहभागी हुनेछन्।

महतका अनुसार भेलामा कांग्रेसका विभिन्न नेता तथा कार्यकर्ताको उल्लेख्य सहभागिता गराउने तयारी भइरहेको छ। उनी स्वयं अहिले भेलामा प्रस्तुत गरिने प्रतिवेदन तयार पार्ने काममा जुटेका छन्।

कांग्रेसभित्र गत पुसमा सम्पन्न दोस्रो विशेष महाधिवेशनपछि नेतृत्वलाई लिएर विवाद कायमै छ। उक्त महाधिवेशनबाट सभापति बनेका गगनकुमार थापालाई देउवा पक्षले स्वीकार नगरेको अवस्था छ। थापा नेतृत्वमा पार्टीले नियमित १५औँ महाधिवेशनको तयारी अघि बढाइरहेको भए पनि संस्थापन इतर समूहभित्रै पनि साझा धारणा बन्न सकेको छैन।

पार्टीका विभिन्न समूहबीच पछिल्लो समय आरोप–प्रत्यारोप बढ्दै गएको छ। यसले कांग्रेसको आन्तरिक विवाद अझ गहिरिने र पार्टी विभाजनसम्म पुग्न सक्ने आशंकासमेत बढाएको छ।

यद्यपि महतले पार्टी विभाजनको सम्भावना अस्वीकार गर्दै कांग्रेसलाई एकताबद्ध बनाउने प्रयास भइरहेको बताएका छन्।

‘पार्टी एकजुट गर्ने प्रक्रियामै छौँ। देउवा दाइ पनि आउनुहुन्छ, त्यसपछि छलफल होला,’ महतले भने, ‘अहिलेसम्म एकजुट गर्ने तयारीमा लागेका छौँ, तर गगनजीहरू लचिलो हुनुभएन।’

साउन २८ को भेलामा देउवाको सहभागितालाई कांग्रेसभित्रको शक्ति सन्तुलन र आगामी राजनीतिक रणनीतिका दृष्टिले अर्थपूर्ण रूपमा हेरिएको छ। भेलाबाट संस्थापन इतर समूहको आगामी रणनीति तथा पार्टीभित्र देखिएको विवाद समाधानका विषयमा थप छलफल हुने अपेक्षा गरिएको छ।