काठमाडौं। नेपाली कांग्रेसको संस्थापन इतर समूहले आयोजना गर्न लागेको राष्ट्रिय भेलालाई कांग्रेसका पूर्वसभापति शेरबहादुर देउवाले सम्बोधन गर्ने भएका छन्। साउन २९ गतेदेखि काठमाडौंमा सुरु हुने उक्त भेलामा देउवाको विशेष सम्बोधन रहने जानकारी आयोजक पक्षले दिएको हो।

शुक्रबार काठमाडौंमा आयोजित पत्रकार सम्मेलनमा राष्ट्रिय भेला आयोजक समितिका संयोजक डा. शशाङ्क कोइरालाले भेलाको तयारी अन्तिम चरणमा पुगेको जानकारी दिँदै पूर्वसभापति देउवाले उद्घाटन सत्रलाई सम्बोधन गर्ने कार्यक्रम तय भएको बताए। उनका अनुसार भेलामा देशभरबाट कांग्रेसका नेता, कार्यकर्ता तथा शुभेच्छुकहरूको उल्लेखनीय सहभागिता रहने अपेक्षा गरिएको छ।

डा. कोइरालाले वर्तमान राजनीतिक परिस्थितिमा नेपाली कांग्रेसलाई थप एकताबद्ध, सशक्त र जनमुखी बनाउने उद्देश्यका साथ राष्ट्रिय भेला आयोजना गरिएको बताए। उनले राष्ट्रसामु देखिएका राजनीतिक, आर्थिक तथा सामाजिक चुनौतीहरूको सामना गर्न कांग्रेसभित्र आपसी एकता र वैचारिक स्पष्टता आवश्यक रहेको धारणा राखे।

‘राष्ट्रियता, लोकतन्त्र र समाजवादका मूलभूत सिद्धान्तमा आधारित भएर पार्टीलाई नयाँ दिशासहित नयाँ जीवन दिने हाम्रो दृढ सङ्कल्प छ,’ उनले भने, ‘यो भेला कुनै व्यक्ति वा समूहको स्वार्थका लागि नभई पार्टीलाई थप सुदृढ, व्यवस्थित र प्रभावकारी बनाउने उद्देश्यले आयोजना गरिएको हो।’

उनले कांग्रेसलाई जनताको अपेक्षाअनुसार अघि बढाउन संगठन सुदृढीकरण, आन्तरिक एकता, वैचारिक बहस र नेतृत्वबीच समन्वय अपरिहार्य रहेको पनि बताए। भेलामार्फत पार्टीको भावी कार्यदिशा, संगठन सुदृढीकरण, समसामयिक राजनीतिक परिस्थितिलगायत विषयमा व्यापक छलफल हुने उनले जानकारी दिए।

आयोजकका अनुसार भेलामा देशभरबाट आएका प्रतिनिधिहरूले पार्टीभित्र देखिएका चुनौती, संगठन विस्तार, आगामी राजनीतिक रणनीति तथा राष्ट्रिय मुद्दामा कांग्रेसको भूमिकाबारे आफ्ना धारणा राख्नेछन्। भेलाबाट प्राप्त सुझाव र निष्कर्षलाई आगामी दिनमा पार्टीको नीति तथा कार्यक्रम निर्माणमा उपयोग गर्ने तयारी पनि गरिएको छ।

पछिल्लो समय कांग्रेसभित्र वैचारिक बहस र संगठनात्मक सक्रियता बढिरहेका बेला हुन लागेको यो राष्ट्रिय भेलालाई पार्टीभित्रको महत्त्वपूर्ण राजनीतिक कार्यक्रमका रूपमा हेरिएको छ।