नयाँ दिल्ली । भारतकी रेणु धरियालले करिब एक दशकदेखि कपाल नकाटी जीवित महिलामध्ये सबैभन्दा लामो कपालको विश्व कीर्तिमान बनाएकी छन्।

गिनिज वर्ल्ड रेकर्डका अनुसार रेणुको कपालको लम्बाइ २७१.५० सेन्टिमिटर अर्थात् ८ फिट १० इन्च मापन गरिएको छ। उत्तराखण्डको हल्द्वानीमा अप्रिलमा गरिएको मापनपछि उनको कीर्तिमान प्रमाणित भएको हो। उनले यसअघि यो रेकर्ड राखेकी युक्रेनकी आलिया नासिरोभालाई पछि पारेकी हुन्। नासिरोभाको कपाल २५७.३३ सेन्टिमिटर लामो थियो।

रेणु युट्युबर हुन् र आफ्नो च्यानलमार्फत सौन्दर्य तथा कपालसम्बन्धी सामग्रीसमेत साझा गर्दै आएकी छन्। उनका अनुसार उनले सन् २०१५ देखि कपाल काटेकी छैनन्।

उनले लामो कपाल राख्नुको कारण भारतीय संस्कृति र परम्परासँग जोडिएको बताएकी छन्। उनका अनुसार लामो कपाललाई भारतीय समाजमा सौन्दर्य र सांस्कृतिक पहिचानसँग जोडेर हेर्ने गरिन्छ। यही मान्यताबाट प्रेरित भएर उनले कपाल बढाउन थालेकी हुन्।

उनको कपालको लम्बाइ सामान्यभन्दा निकै बढी भएकाले दैनिक हेरचाह पनि चुनौतीपूर्ण छ। कपाल धुने, सुकाउने र अल्झिएको भाग मिलाउन उनलाई लामो समय लाग्ने गरेको उनले बताएकी छन्।

रेणुले कपालको हेरचाहमा सकेसम्म प्राकृतिक सामग्री प्रयोग गर्ने गरेको दाबी गरेकी छन्। घरमै तयार गरिएको तेल तथा स्याम्पु प्रयोग गर्ने र रासायनिक उत्पादनबाट टाढा रहने गरेको उनको भनाइ छ। कपालको हेरचाहसम्बन्धी आफ्ना अनुभव तथा उपायसमेत उनले युट्युबमार्फत सार्वजनिक गर्दै आएकी छन्।

यति लामो कपालका कारण सार्वजनिक स्थानमा पुग्दा आफूलाई मानिसहरूले चासोका साथ हेर्ने गरेको रेणुले बताएकी छन्। सामाजिक सञ्जालमा समेत उनको कपाललाई लिएर प्रशंसा र कौतुहलता देखिने गरेको उनको भनाइ छ।

कपाल भुइँमा नलत्रियोस् भनेर रेणुले प्रायः त्यसलाई लामो चुल्ठो बनाएर बाँध्ने गर्छिन्। लामो कपालका कारण दैनिक गतिविधिमा सहजता कायम राख्न पनि विशेष सावधानी अपनाउनुपर्ने उनको अनुभव छ।

विश्व कीर्तिमान कायम गरेपछि रेणुले आफ्नो उपलब्धिले भारत र आफ्नो स्थानीय समुदायलाई अन्तर्राष्ट्रिय स्तरमा चिनाउन सहयोग पुग्ने अपेक्षा राखेकी छन्।