काठमाडौं। नेपाली कांग्रेसका नेता डा. प्रकाशशरण महतले आगामी महाधिवेशनलाई निष्पक्ष र विश्वसनीय बनाउन पार्टीभित्र सबै पक्षको सहभागिता सुनिश्चित हुने संरचना निर्माण गर्नुपर्ने बताएका छन्।

नुवाकोट क्षेत्र नम्बर १ को अगुवा कार्यकर्ता भेलालाई सम्बोधन गर्दै महतले पार्टीका महत्वपूर्ण निर्णय र निर्वाचन प्रक्रियामा कुनै एक पक्षको प्रभाव नदेखिने वातावरण बनाउन आवश्यक रहेको बताए। विगतमा निर्वाचन समिति, अनुशासन समिति, क्रियाशील सदस्यता टुंगो लगाउने समिति र विधान समितिजस्ता संरचनामा सबै पक्षलाई समेट्ने अभ्यासले विवाद न्यूनीकरण गर्न सहयोग गरेको उनको भनाइ थियो।

‘अहिले हामीलाई धेरै कुरा चाहिएको होइन, निष्पक्ष अधिवेशन गराउन सक्ने एउटा निष्पक्ष संरचना मात्र चाहिएको हो,’ महतले भने।

निर्वाचन प्रक्रियामा सम्बन्धित पक्षलाई आफ्नो धारणा राख्ने र निर्णयमाथि प्रश्न उठे सुनुवाइको अवसरसमेत उपलब्ध हुनुपर्ने उनले बताए। एउटा पक्षले तयार पारेको सदस्यता सूचीलाई मात्र आधार बनाएर निर्वाचन प्रक्रिया अघि बढाइएमा त्यसले थप विवाद सिर्जना गर्ने उनको तर्क थियो।

महतले कांग्रेस विभाजन गर्ने पक्षमा आफूहरू नरहेको स्पष्ट पार्दै आफूहरूविरुद्ध भइरहेको प्रचारलाई नियोजित भने। पार्टीलाई लोकतान्त्रिक र एकताबद्ध ढंगले अघि बढाउने उद्देश्यले नै आफूहरू सामूहिक रूपमा सक्रिय भएको उनको दाबी थियो।

पार्टी नेतृत्वसम्बन्धी विवादमा अदालतको निर्णय आफूहरूलाई अनुकूल नभए पनि कानुनी प्रक्रियाको सम्मान गर्नुपर्ने उनले बताए। पुनरावलोकनको प्रक्रियासमेत अघि बढाइएको उल्लेख गर्दै महतले प्रधानन्यायाधीशको नेतृत्वमा रहेको तीन सदस्यीय इजलासबाट त्यससम्बन्धी निर्णय भएको बताए।

निर्वाचन आयोगको निर्णय प्रक्रियाप्रति पनि उनले असन्तुष्टि जनाए। सम्बन्धित सबै पक्षलाई आफ्नो भनाइ राख्ने अवसर दिनुपर्नेमा आयोगले एक पक्षको धारणा सुनेर निर्णय गरेको उनको आरोप थियो।

पार्टीभित्रको विवाद समाधान गर्न यसअघि विभिन्न संयन्त्र निर्माण र दुई पक्षका समितिहरूबीच समायोजनको प्रयास भए पनि सहमति जुट्न नसकेको महतले बताए। व्यक्तिगत तहमा संवाद भइरहे पनि समग्र समस्या समाधान नभएपछि सामूहिक रूपमा अघि बढ्नुपरेको उनको भनाइ थियो।

महतका अनुसार २९, ३० र ३१ गते आयोजना हुने भेलामा कांग्रेसको वैचारिक तथा सांगठनिक अवस्थाबारे विस्तृत छलफल हुनेछ। पार्टीको विचार र सिद्धान्त, राष्ट्रियता, प्रजातन्त्र तथा समाजवादमा आएको विचलन, मुलुकको आर्थिक अवस्था, सरकारको कार्यसम्पादन, संगठन सञ्चालन तथा विधान संशोधनलगायत विषय भेलाका मुख्य एजेन्डा हुनेछन्।

पछिल्लो अदालतको प्रक्रियाले तत्काल पार्टी विभाजनतर्फ जाने सम्भावना रोकिएको पनि महतले बताए। अदालतबाट कांग्रेसको नेतृत्वसम्बन्धी विषयमा अन्तिम निर्णय हुने भएकाले अहिले पार्टीभित्रै समाधान खोज्ने अवसर रहेको उनको भनाइ थियो।

उनले अदालतको अन्तिम फैसला आउनुअघि नै पार्टीभित्र सहमति कायम गर्न सकिने भन्दै देशभरका कांग्रेस कार्यकर्तालाई आगामी भेलामा सहभागी हुन आग्रह गरे।

महतले १४औँ महाधिवेशनबाट निर्वाचित सभापति शेरबहादुर देउवा नेपाल फर्किन लागेको जानकारी पनि दिए। देउवा २६ गते नेपाल आउने कार्यक्रम रहेको बताउँदै उनले कार्यकर्तालाई स्वागतका लागि उपस्थित हुन आग्रह गरे।

देउवा २६ गते राति ९ः४५ बजे नेपाल आइपुग्ने तय भए पनि सबैलाई सहज हुने गरी दिउँसो नै आउने व्यवस्था मिलाउने प्रयास भइरहेको महतले बताए।