काठमाडौं। नेपाली कांग्रेसका पूर्वसभापति शेरबहादुर देउवा एक्लै नेपाल फर्किने भएका छन्। हङकङ हुँदै गत शुक्रबार थाइल्यान्डको राजधानी बैंकक पुगेका देउवा साउन २८ गते बिहीबार नेपाल फर्किन लागेका हुन्।

देउवासँगै नेपालबाहिर रहेका पूर्वपरराष्ट्रमन्त्री एवं कांग्रेस नेतृ आरजु राणा देउवा र उनका छोरा जयवीर देउवा भने नेपाल नफर्किने देउवानिकट स्रोतले जनाएको छ।

यसअघि देउवा साउन २६ गते नै नेपाल फर्किने तयारीमा थिए। तर, समय व्यवस्थापनमा समस्या भएपछि उनको नेपाल फर्किने कार्यक्रम दुई दिन पछि सारिएको स्रोतको भनाइ छ।

नेपाली कांग्रेसको असन्तुष्ट पक्षले साउन २९ देखि ३१ गतेसम्म काठमाडौंमा आयोजना गर्न लागेको भेलामा सहभागी हुन देउवा नेपाल फर्किन लागेको बताइएको छ।

कांग्रेसभित्र पछिल्लो समय बढ्दै गएको आन्तरिक असन्तुष्टि र नेतृत्वलाई लिएर भइरहेको बहसका बीच देउवाको नेपाल आगमनलाई अर्थपूर्ण रूपमा हेरिएको छ। भेलामा पार्टीको आगामी रणनीति, नेतृत्व तथा आन्तरिक विवादका विषयमा समेत छलफल हुने बताइएको छ।