काठमाडौं। नेपाली कांग्रेस भक्तपुरका सभापति दुर्लभ थापाले पार्टीभित्र रहेका ‘परजीवी’ प्रवृत्तिका कारण कांग्रेस कमजोर बनेको टिप्पणी गरेका छन्।

शुक्रबारदेखि सुरु भएको कांग्रेस संस्थापनइतर समूहको राष्ट्रिय भेलालाई सम्बोधन गर्दै थापाले नेताको फेरो समातेर आफ्नो राजनीतिक स्वार्थ पूरा गर्ने प्रवृत्तिप्रति आक्रोश व्यक्त गरेका हुन्।

‘तपाईंहरू परजीवी हो, परजीवी,’ थापाले भने, ‘यी परजीवी कहिले गिरिजाबाबुका थिए, कहिले सुशीलदाका थिए, कहिले शेरबहादुर देउवाका थिए। अहिले परजीवीहरू सानेपातिर छन्।’

उनले कांग्रेसभित्र यस्तो प्रवृत्ति अन्त्य नभएसम्म पार्टीको अवस्था सुधार हुन नसक्ने दाबी गरे। नेताको नाम र गुट परिवर्तन गर्दै व्यक्तिगत स्वार्थमा केन्द्रित हुने प्रवृत्तिले पार्टीलाई कमजोर बनाएको उनको भनाइ थियो।

थापाले पूर्वप्रधानमन्त्री एवं कांग्रेसका निवर्तमान सभापति शेरबहादुर देउवा र महामन्त्री गगन थापासँग जोडिएका घटनालाई लिएर सामाजिक सञ्जालमा टिप्पणी गर्नेहरूप्रति पनि प्रश्न उठाए।

देउवा स्वदेश फर्किँदा ठूलो संख्यामा नेता–कार्यकर्ता स्वागतमा सहभागी भएको प्रसंग उल्लेख गर्दै उनले देउवामाथि विगतमा आक्रमण हुँदा ती व्यक्तिहरू कहाँ थिए भन्ने प्रश्न गरे।

‘शेरबहादुर देउवाले कुटाइ खाँदा मात्रै होइन, गगन थापाको घर जल्दा सामाजिक सञ्जालमा लेख्ने साथीहरू कहाँ थिए?’ थापाले प्रश्न गरे।

उनले पार्टीभित्र आरोप–प्रत्यारोपभन्दा संगठनलाई बलियो बनाउने र कार्यकर्ताको भूमिकालाई प्राथमिकता दिने राजनीतिक संस्कार आवश्यक रहेको धारणा राखेका छन्।

भिडियो: