नेविसंघले मंगलबार त्रिचन्द्र क्याम्पसमा खाली ग्यास सिलिन्डर बोकेर प्रदर्शन गर्दै ग्यासको सहज आपूर्ति सुनिश्चित गर्न सरकारसँग माग गरेको हो।

ग्यासको खोजीमा लामो समय लाइन बस्नुपर्ने र बजारमा सहज रूपमा सिलिन्डर नपाउँदा विद्यार्थीको नियमित पढाइ प्रभावित भएको नेविसंघको भनाइ छ। पढ्ने समयमा ग्यास खोज्दै हिँड्नुपर्ने अवस्था आएको भन्दै विद्यार्थीले सरकारको व्यवस्थापनप्रति असन्तुष्टि जनाएका छन्।

प्रदर्शनमा सहभागी विद्यार्थीहरूले विभिन्न मागसहितका प्लेकार्ड बोकेका थिए। उनीहरूले ‘नो लाइन भनेको होइन सरकार ? ग्यासमा लाइन किन देखियो ?’, ‘चुल्हो निभ्यो, पढाइ रोकियो, सरकारको व्यवस्थापन कहाँ हरायो ?’, ‘विद्यार्थीको हातमा कलम चाहिन्छ, खाली सिलिन्डर होइन’, ‘ग्यासको समस्या समाधान गर’ र ‘विद्यार्थीको समस्या समाधान गर’ लगायतका नारा लगाएका थिए।

नेविसंघले ग्यासको अभाव तत्काल अन्त्य गरी विद्यार्थी तथा सर्वसाधारणलाई सहज रूपमा खाना पकाउने ग्यास उपलब्ध गराउन सरकारको ध्यानाकर्षण गराएको छ।