काठमाडौं। जनकवि दुर्गालाल श्रेष्ठको अन्तिम बिदाइमा सरकारका मन्त्री, जनप्रतिनिधि तथा विभिन्न राजनीतिक दलका नेताहरू सहभागी भएका छन्।

मंगलबार शोभाभगवतीमा आयोजित अन्तिम श्रद्धाञ्जली कार्यक्रममा गृहमन्त्री सुधन गुरुङ, ऊर्जा, जलस्रोत तथा सिँचाइमन्त्री विराजभक्त श्रेष्ठ, काठमाडौं महानगरपालिकाकी कार्यवाहक प्रमुख सुनिता डंगोल, नेपाली कांग्रेसका सभापति गगनकुमार थापालगायत सहभागी भएका थिए। उनीहरूले श्रेष्ठको पार्थिव शरीरमा माल्यार्पण गर्दै श्रद्धाञ्जली अर्पण गरे।

श्रेष्ठको पार्थिव शरीरलाई शोभाभगवतीस्थित घाटमा नेवारी परम्पराअनुसार अन्त्येष्टि गरिँदै छ।

जनकवि श्रेष्ठको आइतबार बुढानीलकण्ठस्थित आफ्नै निवासमा ९३ वर्षको उमेरमा निधन भएको थियो। नेपाली भाषा, साहित्य र सांस्कृतिक क्षेत्रमा महत्वपूर्ण योगदान पुर्‍याएका श्रेष्ठका सिर्जना र गीतहरूले नेपाली तथा नेपालभाषी साहित्यमा छुट्टै पहिचान बनाएका छन्।

उनको निधनसँगै साहित्य तथा सांस्कृतिक क्षेत्रमा शोक व्यक्त गरिएको छ।

प्रधानमन्त्री बालेन्द्र शाहले समेत श्रेष्ठप्रति श्रद्धाञ्जली व्यक्त गर्दै उनका सिर्जना, विचार र योगदान नेपाली समाजमा लामो समयसम्म जीवित रहने बताएका छन्।