काठमाडौं । नेपाली कांग्रेस संसदीय दलका सचेतक निष्कल राईले इलामलाई पर्यटन बजेटमा उपेक्षा गरिएको भन्दै संस्कृति, पर्यटन तथा नागरिक उड्डयनमन्त्री खड्गराज पौडेलसँग प्रश्न गरेका छन् ।

तर, मन्त्री पौडेलले इलामका लागि बजेट विनियोजन भएको विवरण सुनाए पनि राईले उठाएको मूल प्रश्नको स्पष्ट जवाफ दिन सकेनन् ।

प्रतिनिधिसभाको मंगलबारको बैठकमा राईले आर्थिक वर्ष २०८३/८४ को पर्यटन मन्त्रालयको बजेट पुस्तिकामा ‘इलाम’ शब्द नै नदेखिएको भन्दै सरकारको प्राथमिकतामाथि प्रश्न उठाएका थिए ।

इलाम चिया बगान, प्राकृतिक सौन्दर्य, हरियाली, सांस्कृतिक विविधता र कृषि पर्यटनका कारण महत्वपूर्ण पर्यटकीय गन्तव्य रहेको उल्लेख गर्दै उनले सरकारले जिल्लालाई बजेटमा किन नदेखेको भन्दै प्रश्न गरे ।

‘पर्यटन मन्त्रालयअन्तर्गतको यो बजेट पुस्तिकामा तीन अक्षरको ‘इलाम’ शब्द कतै देख्न पाइएन,’ राईले भने, ‘झन्डै दुई तिहाइको सरकारले इलाम जिल्ला किन देखेन ?’

उनले सरकारले अघि सारेको ‘ट्रेक टु टुरिजम डेभलपमेन्ट प्रोजेक्ट’ लाई समेत जोडेर थप प्रश्न गरे । उनका अनुसार उक्त परियोजना नयाँ योजना नभई क्रमागत प्रकृतिको हो । त्यसैले यसपटकको २८ पृष्ठको बजेट पुस्तिकामा इलामका लागि नयाँ योजना नदेखिएको उनको दाबी थियो ।

‘यो २८ पन्नाको बजेट पुस्तिकामा पर्यटन मन्त्रालयअन्तर्गत इलामलाई कुनै नयाँ योजना आएको छैन । मैले अध्ययन गरेँ,’ राईले भने, ‘कि मेरो आँखा कमजोर भएको हो कि ?’

जवाफमा मन्त्री पौडेलले भने इलामका विभिन्न क्षेत्रमा बजेट छुट्याइएको जानकारी दिए । उनका अनुसार ‘ट्रेक टु टुरिजम डेभलपमेन्ट प्रोजेक्ट’ अन्तर्गत सूर्योदय नगरपालिकाका लागि १ करोड ८४ लाख र इलाम नगरपालिकाका लागि ४१ लाख रुपैयाँ विनियोजन गरिएको छ ।

त्यस्तै, कन्याम, फिक्कल र अन्तुडाँडा क्षेत्रमा होटल निर्माण, विकास तथा विस्तार परियोजनाका लागि ३ करोड रुपैयाँ छुट्याइएको उनले बताए ।

यी शीर्षकमा गरी इलामका लागि कुल ४ करोड ९५ लाख रुपैयाँ विनियोजन भएको मन्त्रीको भनाइ थियो ।

तर, राईले उठाएको बजेट पुस्तिकामा जिल्लाको नाम नसमेटिएको र नयाँ योजना के आयो भन्ने प्रश्नमा मन्त्रीले स्पष्ट जवाफ दिएनन् । बरु, इलामका विभिन्न क्षेत्रको नाम बजेटमा रहेको भन्दै पुस्तिका हेर्न आग्रह गरे ।

‘इलाम भन्ने शब्द नपरेकोमा क्षमा याचना गर्दछु । तर, इलामका धेरैजसो क्षेत्रको नाम यहाँ आएको छ,’ मन्त्री पौडेलले भने, ‘माननीयज्यूलाई बजेट पुस्तिका पल्टाएर हेर्नुहुन र शंका भएमा मन्त्रालयमा सम्पर्क राख्न अनुरोध गर्दछु ।’

मन्त्रीको जवाफपछि राईले आफूले बजेट पुस्तिका अध्ययन गरेरै प्रश्न गरेको बताए । उनले ‘ट्रेक टु टुरिजम’ परियोजना पहिले पनि रहेको उल्लेख गर्दै यसपटक इलामका लागि नयाँ योजना नदेखिएको विषयमा पुनः स्पष्टता खोजे ।

जवाफमा मन्त्री पौडेलले ‘क्रमागत योजना परेको ठाउँमा थपिएको योजना नपर्नु स्वाभाविक हो’ भने ।

मन्त्रीको यो जवाफले राईले उठाएको मुख्य प्रश्न भने प्रस्ट पारेन । राईले बजेट पुस्तिकामा इलामको नाम नदेखिएको र नयाँ योजना नभएको विषयमा जवाफ मागेका थिए । मन्त्रीले भने स्थानीय तह र पर्यटकीय क्षेत्रका लागि विनियोजन गरिएको रकमको विवरण सुनाए ।

यसरी प्रश्नको केन्द्रमा रहेको नयाँ योजना र बजेट पुस्तिकामा इलामको नाम नपर्नुको कारण स्पष्ट नगरी मन्त्रीले रकम विनियोजनका विवरण प्रस्तुत गरेपछि प्रश्नोत्तर गोलमटोल बनेको देखिएको हो ।