काठमाडौं। सडक डिभिजन कार्यालय इलामले ठेक्का सम्झौता तोडिएका विभिन्न निर्माण व्यवसायीलाई सरकारी बाँकी रकम ३५ दिनभित्र दाखिला गर्न अन्तिम ताकेता गरेको छ ।

डिभिजनअन्तर्गत सञ्चालित विभिन्न आयोजनामा सम्झौताअनुसारको दायित्व पूरा नगरी गम्भीर रूपमा करारीय दायित्व उल्लङ्घन गरेपछि सम्बन्धित निर्माण व्यवसायीका ठेक्का सम्झौता अन्त्य गरिएको कार्यालयले जनाएको छ ।

ठेक्का सम्झौता अन्त्यपछि सार्वजनिक खरिद सम्झौता तथा सार्वजनिक खरिद ऐन, २०६३ को दफा ५९(८) बमोजिम कायम भएको सरकारी बाँकी रकम दाखिला गराउन कार्यालयले यसअघि पटक–पटक प्रयास गरेको थियो । आर्थिक कार्यविधि तथा वित्तीय उत्तरदायित्व नियमावली, २०७७ बमोजिम रकम दाखिला गर्न आग्रह गरिए पनि हालसम्म रकम नबुझाएपछि कार्यालयले बिहीबार सार्वजनिक सूचना जारी गरेको हो ।

सूचनाअनुसार सम्बन्धित निर्माण व्यवसायीले सूचना प्रकाशित भएको मितिले ३५ दिनभित्र नेपाल सरकारको नेपाल बैंक लिमिटेडमा रहेको राजस्व खातामा सरकारी बाँकी रकम जम्मा गर्नुपर्नेछ । रकम दाखिला गरेपछि त्यसको बैंक भौचर सडक डिभिजन कार्यालय इलाममा पेस गर्नुपर्नेछ ।

कार्यालयले रकम जम्मा गर्न राजस्व खाता नम्बर ००१०१००००००००१००१००१, राजस्व कोड नम्बर १४३१२ र कार्यालय कोड नम्बर ३३७०१०३०१ तोकेको छ ।

सडक डिभिजनका अनुसार पाँचथरको बुढाथोकी निर्माण सेवाले २३ लाख ४ हजार ५८७ रुपैयाँ ४५ पैसा, ताप्लेजुङको मावोहाङ निर्माण सेवाले १ करोड ८ लाख २५ हजार २ रुपैयाँ ६२ पैसा र मकवानपुरको शिव शक्ति इन्फ्रा डेभलपर्स प्रालिले दुईवटा ठेक्काबापत क्रमशः ४ करोड ५९ लाख ७१ हजार ५६३ रुपैयाँ ७५ पैसा र ३ करोड ४२ लाख ४७ हजार ७०८ रुपैयाँ ६८ पैसा बुझाउनुपर्नेछ ।

त्यस्तै, इलामको एमडी ब्रो कन्स्ट्रक्सन प्रालिले ९ लाख ३४ हजार ७५० रुपैयाँ १ पैसा, धनकुटाको शाह/पूजा जेभीले दुईवटा ठेक्काबापत क्रमशः ८६ लाख ३३ हजार ३१३ रुपैयाँ ७८ पैसा र ५७ लाख ३६ हजार ९५९ रुपैयाँ ६७ पैसा बुझाउनुपर्नेछ ।

धनकुटाकै आशिवर्दि/पूजा जेभीले १ करोड ७१ लाख ७४ हजार १६३ रुपैयाँ ९२ पैसा, इलामको माइ–जोगमाईस्थित एबिसी निर्माण सेवाले १ करोड १८ लाख १३ हजार ३८४ रुपैयाँ २३ पैसा तथा धनुषाको केएम कन्स्ट्रक्सनले ३६ लाख ८७ हजार ७२६ रुपैयाँ ३६ पैसा बुझाउनुपर्ने कार्यालयले जनाएको छ ।

यसैगरी पाँचथरको टेक एण्ड सपना कन्स्ट्रक्सन प्रालिले ७९ लाख ४९ हजार २४५ रुपैयाँ २९ पैसा र धनुषाको गायत्री माँ कन्स्ट्रक्सन एण्ड समरित कन्स्ट्रक्सन जेभीले १ करोड ९९ लाख १४ हजार ४४७ रुपैयाँ ९९ पैसा सरकारी बाँकी रकम दाखिला गर्नुपर्नेछ ।

कार्यालयले तोकिएको अवधिभित्र रकम दाखिला नगरेमा प्रचलित कानुनबमोजिम सरकारी बाँकी रकम असुलीसम्बन्धी थप प्रक्रिया अघि बढाइने जनाएको छ।