काठमाडौं । भोटेकोशी नदीमा आएको भीषण बाढीबाट प्रभावित नागरिकका लागि नेपाल टेलिकमले दिँदै आएको निःशुल्क सञ्चार सुविधा थप तीन दिन लम्ब्याएको छ।

टेलिकमले बाढी प्रभावित रसुवा तथा आसपासका क्षेत्रमा भदौ १२, १३ र १४ गतेसम्म निःशुल्क सञ्चार सेवा निरन्तरता दिने जनाएको छ।

यस अवधिमा प्रभावित सेवाग्राहीले दैनिक २ जीबी मोबाइल डाटा र ५० वटा एसएमएस निःशुल्क प्रयोग गर्न पाउनेछन्। यस्तै, भ्वाइस कलका लागि पनि कुनै शुल्क लाग्ने छैन।

भोटेकोशी र त्रिशूली नदीमा पानीको बहाव बढिरहेका बेला रसुवा, नुवाकोट, धादिङ, गोरखा र चितवनका नदी किनारका बासिन्दालाई टेलिकमले एसएमएसमार्फत सतर्क रहन र सुरक्षित स्थानमा जानसमेत आग्रह गरिरहेको छ।

विपद्का बेला प्रभावित नागरिकलाई आफन्त, सुरक्षाकर्मी, उद्धार टोली तथा राहतकर्मीसँग सम्पर्क गर्न सहज होस् भनेर निःशुल्क सञ्चार सुविधा थप गरिएको टेलिकमले जनाएको छ।

बाढीबाट टेलिकमका केही संरचनामा क्षति पुगे पनि सेवा प्रभावित हुन नदिन प्राविधिक टोली परिचालन गरिएको छ।

प्रवक्ता डा. कमल लामिछानेद्वारा जारी विज्ञप्तिअनुसार टोलीले क्षतिग्रस्त संरचनाको मर्मत तथा सेवा नियमित बनाउने कामलाई निरन्तरता दिइरहेको छ।