काठमाडौं । रसुवामा आएको बाढीबाट प्रभावितको उद्धार तथा राहतका लागि नेपाली सेनाले व्यापक रूपमा जनशक्ति र हवाई साधन परिचालन गरेको छ। बाढी प्रभावित क्षेत्रमा उद्धार कार्यलाई तीव्र बनाउन नेपाली सेनाका ६ र गैरसैनिक ९ गरी १५ वटा हेलिकप्टर परिचालन गरिएको छ।

नेपाली सेनाका अनुसार शुक्रबार बिहान ९ बजेसम्म हवाई साधनमार्फत ८२९ जनाको उद्धार गरिएको छ। उद्धार गरिएकामध्ये नेपाली सेनाका हेलिकप्टरबाट ७२४ जना र गैरसैनिक हेलिकप्टरबाट १०५ जनालाई सुरक्षित स्थानमा ल्याइएको हो।

नेपाली सेनाका प्रवक्ता उपरथी राजाराम बस्नेतका अनुसार उद्धार गरिएकामध्ये १०१ जना विदेशी नागरिकसमेत रहेका छन्।

बाढीका कारण रसुवाका विभिन्न क्षेत्रमा प्रभावित तथा जोखिममा परेकाको उद्धारलाई प्राथमिकतामा राखिएको सेनाले जनाएको छ। उद्धार तथा राहतका लागि ४ हजार ५ सयभन्दा बढी सैनिक परिचालन गरिएको छ।

सेनाले स्थल तथा हवाई माध्यमबाट प्रभावित क्षेत्रमा उद्धार, राहत तथा आवश्यक सहयोगका कामलाई निरन्तरता दिइरहेको जनाएको छ।