काठमाडौं। भोटेकोशी नदीमा आएको बाढीका कारण विभिन्न क्षेत्रमा अलपत्र परेका ११७ जना विदेशी पर्यटकको उद्धार गरिएको छ। नेपाल पर्यटन बोर्डका अनुसार उद्धार गरिएकामध्ये ८५ जना भारतीय, १६ जना चिनियाँ र ९ जना कोरियाली पर्यटक रहेका छन्।

 त्यस्तै, दुई जना अमेरिकी र दुई जना इटालियन पर्यटकको समेत उद्धार गरिएको बोर्डले जनाएको छ। उद्धार गरिएका बाँकी तीन पर्यटकको राष्ट्रियता तथा पहिचान भने खुल्न सकेको छैन।

बाढीका कारण अझै ६ सयभन्दा बढी पर्यटक सम्पर्कविहीन रहेको बताइएको छ। विशेषगरी कैलाश मानसरोवर यात्राका लागि हिँडेका ठूलो संख्याका पर्यटक सम्पर्कविहीन रहेको ट्रेकिङ तथा टुर कम्पनीहरूले जनाएका छन्। 

बाढी र पहिरोका कारण सडक तथा यातायातका मार्ग अवरुद्ध हुँदा उनीहरूको खोजी तथा उद्धार कार्यमा कठिनाइ भइरहेको छ। सम्पर्कविहीन पर्यटकको अवस्थाबारे जानकारी लिन सम्बन्धित निकायले खोजी तथा उद्धार प्रयास तीव्र बनाएको छ।