काठमाडौं । सुरुङमा फसेका नेपालीको उद्धारका लागि चीनले विशेषज्ञ टोली नेपाल पठाउने भएको छ।

परराष्ट्र मन्त्रालयका अनुसार नेपालको आग्रहपछि चिनियाँ उद्धार तथा प्राविधिक विशेषज्ञसहितका दुई टोली नेपाल आउन लागेका हुन्। सम्भवतः टोली आजै नेपाल आइपुग्ने र भोलिदेखि उद्धार कार्यमा खटिनेछ।

बाढी प्रभावित क्षेत्रमा बाहिर जोखिममा परेका नागरिकको उद्धार जारी रहे पनि विभिन्न सुरुङभित्र फसेकाको उद्धारका लागि थप दक्ष जनशक्ति आवश्यक परेपछि नेपालले भारत र चीनसँग सहयोग मागेको थियो।

भारतले आवश्यक ११ सदस्यीय उद्धार टोली यसअघि नै नेपाल पठाइसकेको छ। उक्त टोली प्रभावित क्षेत्रमा उद्धार कार्यमा खटिइसकेको छ।

चीनबाट पनि दुईवटा विशेषज्ञ टोली नेपाल आउन लागेको परराष्ट्र मन्त्रालयले जनाएको छ।