काठमाडौं । नेपाली कांग्रेसका सभापति गगन थापाले त्रिशूलीकाे ‘ए’, ‘बी’ लगायत विभिन्‍न जलविद्युत् आयाेजनाकाे  सुरुङभित्र जीवन र मृत्युको दोसाँधमा रहेका नागरिकको उद्धार गर्न विदेशी विज्ञ बाेलाउन हिच्किचाउन नहुने बताएका छन् ।

सुरुङ उद्धारमा नेपाली जनशक्तिको प्रयास महत्वपूर्ण भए पनि उपलब्ध प्राविधिक क्षमता पर्याप्त नदेखिए विशेषज्ञता भएका मुलुकबाट तत्काल सहयोग लिनुपर्ने उनको जोड छ।

उनका अनुसार विपद्का बेला ‘हामी आफैं गर्न सक्छौँ’ भन्‍ने मनोविज्ञानभन्दा नागरिकको जीवन जोगाउने विषय प्राथमिक हुनुपर्छ।

पार्टी केन्द्रीय कार्यालय सानेपामा आइतबार आयोजित पदाधिकारी, केन्द्रीय सदस्य तथा सरोकारवाला पक्षबीचको छलफलमा थापाले आफूले परराष्ट्रमन्त्रीसँग समेत विदेशी सहयोगका लागि आग्रह गरेको बताए।

‘हामीसँग भएको विज्ञताले मात्र सुरुङमा उद्धार गर्न सम्भव छैन भन्ने जानकारी आएपछि मैले परराष्ट्रमन्त्रीलाई सम्पर्क गरी बाह्य मुलुकबाट मद्दत लिन आग्रह गरेको छु,’ थापाले भने।

थापाको भनाइ त्यतिबेला आएको हो, जतिबेला सुरुङलगायतका संरचनाभित्र फसेकाहरूको उद्धार चुनौतीपूर्ण बन्दै गएको छ।

पछिल्लो विवरणअनुसार सरकारले यसअघि विदेशी सहयोग तत्काल आवश्यक नरहेको बताउँदै आएकोमा अहिले विदेशी उद्धार टोलीलाई समेत सहभागी गराउने निर्णयतर्फ अघि बढेको छ।

‘विदेशी सहयोग लिनु कमजोरी होइन’

सभापति थापाले विपद्का बेला छिमेकी तथा अन्य मित्रराष्ट्रबाट सहयोग लिनु स्वाभाविक भएको बताए।

विशेषगरी सुरुङ उद्धारजस्तो जटिल र प्राविधिक काममा अनुभव तथा अत्याधुनिक उपकरण भएका देशको सहयोगले उद्धारको गति र सम्भावना बढाउन सक्ने उनको भनाइ छ ।

उनको तर्कमा विदेशी सहयोग स्वीकार गर्नु सरकार वा नेपाली सुरक्षाकर्मीको क्षमतामाथिको अविश्वास होइन। बरु उपलब्ध सबै राष्ट्रिय तथा अन्तर्राष्ट्रिय स्रोत परिचालन गरेर नागरिकको जीवन जोगाउनु राज्यको जिम्मेवारी हो।

यसअघि सरकारले नेपाली सुरक्षा निकायबाटै खोज तथा उद्धार भइरहेको भन्दै तत्काल विदेशी सहयोग आवश्यक नरहेको बताएको थियो। तर, सुरुङमा फसेकाहरूको उद्धारमा थप प्राविधिक जटिलता देखिएपछि सरकार विदेशी उद्धारकर्तालाई सहभागी गराउने निर्णयमा पुगेको विवरण सार्वजनिक भएको छ।

‘उद्धारमा ढिलाइ गर्ने अवस्था छैन’

थापाले विपद्को समयमा सरकारका कमजोरी औंल्याउनु राजनीतिक आलोचना नभई सहयोग भएको स्पष्ट पारे। उद्धारमा देखिएका ‘ग्याप’ पहिचान गरेर तत्काल सुधार गर्नुपर्ने उनको भनाइ छ।

स्थानीय तहलाई समेत साथ लिएर संघीय सरकारले उद्धार अभियान सञ्चालन गर्नुपर्नेमा उनले जोड दिए। स्थानीय सरकारलाई बाइपास गरेर विपद् व्यवस्थापन प्रभावकारी हुन नसक्ने उनको तर्क छ।

यसैबीच, कांग्रेसले विपद् प्रभावित क्षेत्रमा पार्टीको सम्पूर्ण ध्यान केन्द्रित गर्ने निर्णय गरेको छ। पार्टीका कुनै पनि तहबाट सार्वजनिक उत्सव तथा भड्किला कार्यक्रम नगर्न थापाले निर्देशन दिएका छन्।

‘हरितालिका तीज लगायतका पर्वहरूलाई सामान्य रूपमा मनाउन सकिन्छ तर सार्वजनिक उत्सव र भड्किलो कार्यक्रम नगर्न म आग्रह गर्दछु,’ उनले भने।