काठमाडौं । प्रियंका कार्कीको निर्माण तथा मुख्य अभिनय रहेको फिल्म ‘मास्टर्नी’ ले बक्सअफिसमा अपेक्षाअनुसार व्यापार गर्न सकेको छैन ।

भदौ ५ गतेदेखि प्रदर्शनमा आएको फिल्मले भदौ १४ गतेसम्म ३९ लाख ५२ हजार ८५९ रुपैयाँ ग्रस कमाएको चलचित्र विकास बोर्डको तथ्यांकले देखाएको छ । यो अवधिमा फिल्मका ११ हजार ९९६ टिकट बिक्री भएका छन् ।

चलचित्र विकास बोर्डले सोमबार सार्वजनिक गरेको पछिल्लो विवरणअनुसार पुराना केही फिल्मको व्यापारमा भने उल्लेख्य अन्तर देखिएको छ ।

साउन १ गतेदेखि प्रदर्शनमा रहेको ‘गौंथली’ ले अहिलेसम्म २५ करोड ६८ लाख ६२ हजार ८० रुपैयाँ ग्रस कमाएको छ । फिल्म ९ लाख ३१ हजार ६२७ दर्शकले हेरेका छन् ।

त्यस्तै, साउन २२ गते रिलिज भएको ‘हली’ ले २३ लाख ११ हजार २७० रुपैयाँ कमाएको छ । फिल्मका ८ हजार ४६३ टिकट बिक्री भएका छन् ।

साउन २९ गतेदेखि प्रदर्शनमा आएको ‘लज्जावती’ को व्यापार भने अझ कमजोर देखिएको छ । फिल्मले हालसम्म ७ लाख ७५ हजार ४७० रुपैयाँ ग्रस कमाउँदा २ हजार ७३५ जना दर्शकले टिकट काटेका छन् ।

गत शुक्रबारदेखि प्रदर्शनमा आएको ‘पार्वती’ को बक्सअफिस विवरण भने चलचित्र विकास बोर्डले आगामी सोमबार सार्वजनिक गर्ने जनाएको छ ।