काठमाडौं । देशका विभिन्न जिल्लामा आज साना नदी तथा खोलाको जलसतह बढ्ने सम्भावना देखिएसँगै आकस्मिक बाढीको जोखिम बढेको छ। विशेषगरी नुवाकोट र रसुवामा बाढीको जोखिम उच्च रहेकाले स्थानीय बासिन्दालाई विशेष सावधानी अपनाउन आग्रह गरिएको छ।

नेपाल बाढी सूचनाका अनुसार ताप्लेजुङ, संखुवासभा, सोलुखुम्बु, खोटाङ, ओखलढुंगा, रामेछाप, दोलखा, सिन्धुपाल्चोक, काभ्रेपलाञ्चोक, ललितपुर, भक्तपुर, काठमाडौं, धादिङ, गोरखा, लमजुङ, डोल्पा, रुकुम पूर्व, रुकुम पश्चिम, जाजरकोट, दार्चुला, बैतडी, डडेल्धुरा, डोटी, कैलाली र कञ्चनपुरका आसपासका साना नदी तथा खोलामा पानीको बहाव उल्लेख्य बढ्न सक्ने पूर्वानुमान गरिएको छ।

यी जिल्लाका नदी तथा खोलामा पानीको बहाव बढ्दा आकस्मिक बाढी आउन सक्ने भएकाले मध्यम जोखिम रहेको सूचनामा उल्लेख छ। जोखिमयुक्त क्षेत्रमा बसोबास गर्ने तथा नदी, खोला र खोल्साको आसपास आवतजावत गर्ने नागरिकलाई सतर्कता अपनाउन भनिएको छ।

यस्तै, नुवाकोट र रसुवामा भने साना नदी तथा खोलामा पानीको बहाव अझ तीव्र रूपमा बढ्न सक्ने भएकाले आकस्मिक बाढीको उच्च जोखिम रहेको जनाइएको छ।

पछिल्लो समय बाढीपहिरोका कारण विभिन्न क्षेत्रमा जनधन तथा भौतिक संरचनामा क्षति भइरहेकाले जोखिमयुक्त नदी तथा खोलाको आसपास विशेष सावधानी अपनाउन र सम्भावित विपद्का संकेत देखिए तत्काल सुरक्षित स्थानतर्फ जान सम्बन्धित निकायले आग्रह गरेको छ।