काठमाडौं । कान्स चलचित्र महोत्सवमा पुरस्कृत नेपाली फिल्म ‘तिनीहरू : एलिफेन्ट्स इन द फग’ले भोटेकोसी बाढी प्रभावितको सहयोगार्थ विशेष च्यारिटी शो गर्ने भएको छ।

निर्माण पक्षका अनुसार च्यारिटी शोबाट उठेको रकम प्रधानमन्त्री दैवीप्रकोप उद्धार कोषमा जम्मा गरिनेछ। फिल्मका अन्तर्राष्ट्रिय सह–निर्माताहरूले पनि बाढीपीडितका लागि थप सहयोग जुटाउने भएका छन्।

अविनाशविक्रम शाह निर्देशित ‘तिनीहरू’ कान्स चलचित्र महोत्सवको ‘अन सर्टेन रिगार्ड’ विधामा पुरस्कृत भएको नेपाली फिल्म हो।

जंगली हात्तीको आतंकबाट प्रभावित अल्पसंख्यक समुदायको कथा प्रस्तुत गरिएको फिल्ममा गौरी मल्ल, माओत्से गुरुङलगायत कलाकारले अभिनय गरेका छन्।