काठमाडौं। नेपाली कांग्रेसभित्र १५औँ महाधिवेशनलाई लिएर विवाद चर्किँदै जाँदा पूर्वसभापति शेरबहादुर देउवा समूह भने समानान्तर महाधिवेशनको तयारीमा छ।

भने, देउवा पक्ष कै नेता डा. शेखर कोइराला पार्टी विभाजनको जोखिम बढेपछि विभिन्न धारका नेताहरूलाई साथमा राखेर संवाद र सहमतिको प्रयासमा व्यस्त छन्।

सभापति गगन थापा नेतृत्वको कार्यसमितिले अघि बढाएको १५औँ महाधिवेशन प्रक्रिया रोक्न सर्वोच्च अदालतले अस्वीकार गरेपछि देउवा समूहले छुट्टै महाधिवेशनको तयारी थालेको हो ।

यसअघि देउवा समूहले राष्ट्रिय भेला गर्दै देउवाकै नेतृत्वमा समानान्तर महाधिवेशन गर्ने निर्णय गरेको थियो । भेलाले महाधिवेशनको समन्वय गर्ने जिम्मेवारीसहित कमान्डर पूर्वमहामन्त्री डा. शशांक कोइरालालाई बनाएको थियो।

यस्तै, शशांकले शनिबार विज्ञप्ति जारी गर्दै छुट्टै महाधिवेशनको कार्यतालिका छिट्टै सार्वजनिक गर्ने बताएका थिए। उनले नेता-कार्यकर्तालाई सभापति गगन थापा नेतृत्वको संस्थापन पक्षले अघि बढाएको महाधिवेशन प्रक्रियामा सहभागी नहुनसमेत आग्रह गरेका थिए।

कांग्रेसभित्र महाधिवेशनलाई लिएर दुई धारबीच विवाद बढिरहे पनि पार्टी विभाजनको पक्षमा नरहेका नेताहरूबीच संवादको बाटो खुला रहेको संकेत गरेको छ ।

देउवा समूहले असोजको पहिलो साताबाट वडा अधिवेशन सुरु गर्ने गरी समानान्तर कार्यतालिका ल्याउने तयारी गरिरहँदा संस्थापन पक्षले आफ्नै घोषित कार्यतालिकाअनुसार महाधिवेशन प्रक्रिया अघि बढाउने तयारी गरेको छ ।

यस्तै, कांग्रेसभित्र दुई फरक महाधिवेशनको तयारी अघि बढेमा कांग्रेसको सांगठनिक र वैधानिक विवाद थप जटिल बन्ने देखिएको छ। यद्यपि शेखर विभाजन रोक्न सक्रिय छन्। उनको सक्रियता सार्थक भए, कांग्रेस विभाजन नहुन सक्छ।

कांग्रेसभित्रको मुख्य चुनौती दुई पक्षबीचको महाधिवेशनसम्बन्धी विवाद समाधान गर्नुका साथै क्रियाशील सदस्यता, सांगठनिक संरचना र पार्टीको आधिकारिकतासँग जोडिएका विषयमा सहमति जुटाउनु रहेको छ।

देउवा समूह समानान्तर महाधिवेशनको तयारीमा अघि बढिसकेको अवस्थामा सभापति थापा नेतृत्वको संस्थापन पक्षले असन्तुष्ट समूहलाई कसरी समेट्छ र शेखरको संवादले कस्तो परिणाम दिन्छ भन्ने विषयले कांग्रेसको आगामी राजनीतिक दिशा निर्धारण गर्ने देखिएको छ।