काठमाडौं । नेपाली कांग्रेसकी सांसद रेखाकुमारी यादवले रसुवा बाढीपछि सरकार समयमै सक्रिय भएको भन्ने दाबी र पीडित नागरिकको भोगाइबीच मेल नरहेको बताएकी छन्।

बिहीबार प्रतिनिधिसभाको बैठकमा बोल्दै यादवले विपद् प्राकृतिक घटना भए पनि त्यसबाट नागरिकको ज्यान जोगाउने तयारी, पूर्वसूचना र प्रभावकारी उद्धार राज्यको जिम्मेवारी भएको बताइन्।

बुधबार संसद्मा प्रधानमन्त्री बालेन्द्र शाहले बाढीपछिको अवस्था र सरकारले गरेका उद्धार तथा राहतका कामबारे जानकारी गराउँदै सरकार समयमै परिचालित भएको दाबी गरेका थिए।

तर सांसद यादवले सरकारको दाबीमाथि प्रश्न उठाइन्। उनले भनिन्, ‘सरकारको दाबी र पीडित नागरिकको भोगाइबीच ठूलो फरक देखिन्छ। यदि पूर्वसूचना समयमै पुगेको थियो भने यति धेरै नागरिक किन बेपत्ता भए ?’

उनले बाढीपछि उद्धारमा समेत ढिलाइ भएको भन्दै सरकारसँग त्यसको कारण मागिन्। विपद्को समयमा राज्यको तयारी कागजमा मात्र नभई प्रभावित नागरिकले अनुभूति गर्ने गरी देखिनुपर्ने उनको भनाइ थियो।

भदौ १० गते भोटेकोशी–त्रिशूली नदीमा आएको विनाशकारी बाढीले रसुवाको टिमुरे, स्याफ्रुवेशी र बेत्रावतीसहित नुवाकोट, धादिङ, चितवन र गोरखाका नदी तटीय क्षेत्र प्रभावित भएका छन्।

बाढीबाट ठूलो मानवीय तथा भौतिक क्षति भएको छ। हजारौँ नागरिक बेपत्ता तथा सम्पर्कविहीन छन् भने ठूलो संख्यामा घाइते भएका छन्। प्रभावित क्षेत्रबाट हजारौँ नागरिकको उद्धार गरिएको छ।

यही अवस्थालाई लिएर सांसद यादवले सरकारको तयारी र उद्धार संयन्त्र पर्याप्त भए–नभएको विषयमा गम्भीर समीक्षा आवश्यक रहेको बताएकी हुन्।