काठमाडौं। नेकपा एमालेका सांसद गुरुप्रसाद बरालले रसुवा बाढीपछि उद्धार तथा राहतमा सरकारले गरेको प्रयासको प्रशंसा गर्दै विद्युत् आयोजनाका टनेलमा फसेका निर्माणकर्मी र प्राविधिकको उद्धारमा भने सरकार गम्भीर रूपमा चुकेको बताएका छन्।

बिहीबार प्रतिनिधिसभा बैठकमा बोल्दै बरालले टनेलमा फसेका नागरिकको उद्धारलाई सरकारले सुरुदेखि नै उच्च प्राथमिकतामा राख्न नसकेको बताए।

‘सरकारले जेजति गरेको छ, त्यसका लागि धन्यवाद दिनुपर्छ। तर विद्युत् आयोजनाका टनेलमा फसेका निर्माणकर्मी र प्राविधिकको उद्धारमा सरकार गम्भीर रूपमा चुकेको छ,’ उनले भने।

उनले आयोजनामा काम गरिरहेका निर्माण कम्पनी तथा प्राविधिक जनशक्तिलाई सुरुकै चरणमा उद्धार अभियानमा परिचालन गर्न सकेको भए फसेका नागरिकलाई बचाउन सकिने अवस्था हुन सक्ने बताए।

बरालले बाढीपछिको राहत, पुनःस्थापना र पुनर्निर्माणका काम प्रभावकारी बनाउन उच्चस्तरीय सर्वदलीय संसदीय समिति गठन गर्न पनि माग गरे।