काठमाडौं । बाढी तथा पहिरोबाट प्रभावित रसुवा र नुवाकोटका नागरिकलाई लक्षित गर्दै युवा संघ नेपालले राहत तथा मानवीय सहयोग अभियान सञ्चालन गरेको छ।

युवा संघ नेपालका संयोजक धर्मबहादुर शाहीको नेतृत्वमा परिचालित टोलीले प्रभावित क्षेत्रमै पुगेर पीडित परिवारलाई आवश्यक राहत सामग्री वितरण गरेको हो।

राहत वितरणका क्रममा टोलीले प्रभावित नागरिकसँग प्रत्यक्ष भेटघाट गरी उनीहरूको अवस्था र तत्काल आवश्यक सहयोगबारे जानकारीसमेत लिएको जनाएको छ।

युवा संघ नेपालका कार्यालय सचिव दिपक बि.क.का अनुसार विपद्मा परेका नागरिकलाई तत्काल राहत उपलब्ध गराउने उद्देश्यले अभियान सञ्चालन गरिएको हो। राहत वितरणसँगै प्रभावित क्षेत्रमा आवश्यक मानवीय सहयोग र स्वयंसेवी गतिविधिलाई निरन्तरता दिइने उनले बताए।

उनका अनुसार विपद्पछिको पुनर्स्थापना तथा पुनर्निर्माणका क्रममा प्रभावित क्षेत्रमा सरसफाइ, भग्नावशेष हटाउने, क्षतिग्रस्त संरचना पुनर्निर्माण गर्ने तथा आवश्यक श्रमदानका लागि युवा स्वयंसेवक परिचालन गरिनेछ।

युवा संघ नेपालले विपद्पछिको राहत, पुनर्स्थापना तथा पुनर्निर्माणका लागि सरकारी निकाय, सामाजिक संघसंस्था र स्वयंसेवकबीच समन्वय तथा सहकार्य आवश्यक रहेको जनाएको छ।