काठमाडौं। राष्ट्रिय प्रजातन्त्र पार्टी (राप्रपा)का महामन्त्री शरदराज पाठकले पार्टी परित्याग गरेका छन् ।

उनले महामन्त्रीसहित पार्टीमा आफूले सम्हाल्दै आएका सबै जिम्मेवारीबाट आजैदेखि अलग भएको घोषणा गरेका हुन् ।

पार्टीभित्र लामो समयदेखि देखिँदै आएको आन्तरिक विवाद र गुटगत स्वार्थका कारण आफूले काम गर्ने सम्भावना नदेखेको पाठकले बताएका छन् ।

राजीनामा घोषणा गर्दै जारी गरेको विज्ञप्तिमा उनले राप्रपाको केन्द्रीय नेतृत्वमा स्थापनाकालदेखि नै आन्तरिक बेमेल र गुटगत संघर्ष रहँदै आएको उल्लेख गरेका छन् । पछिल्लो समय यस्तो तिक्तता झन् बढ्दै गएको उनको गुनासो छ ।

भ्रष्टाचारविरुद्ध कडा धारणा राख्दै आएको राप्रपाभित्रै व्यवहार र पारदर्शितामा अपेक्षित प्रतिबद्धता नदेखिएको पाठकको आरोप छ ।

यस्तो अवस्थाले नयाँ पुस्ताका इमानदार, शिक्षित र सचेत युवालाई पार्टीतर्फ आकर्षित गर्न कठिन भइरहेको उनको भनाइ छ ।

आफू र आफूजस्तै नयाँ रूपमा पार्टीमा जोडिएका नेताहरूले समेत विद्यमान अवस्थामा सुधार ल्याउन सक्ने सम्भावना नदेखेको उनले बताएका छन् ।

यद्यपि, पार्टीको तल्लो तहमा रहेका नेता तथा कार्यकर्ताको निष्ठा र प्रतिबद्धताको भने पाठकले प्रशंसा गरेका छन् । उनीहरूबाट आफूले प्रेरणा पाएको उनको भनाइ छ ।

पाठक रविन्द्र मिश्रसँगै विवेकशील साझा पार्टीबाट राप्रपामा प्रवेश गरेका थिए । राप्रपामा आएपछि उनी महामन्त्रीको जिम्मेवारीमा पुगेका थिए ।

महामन्त्री पदमै रहेका पाठकको पार्टी परित्यागलाई राप्रपाभित्रको पछिल्लो आन्तरिक असन्तुष्टिको महत्वपूर्ण घटनाका रूपमा हेरिएको छ ।

उनले यस्तो लेखेका छन् :