काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने र अमेरिकी विदेशमन्त्री मार्को रुबियोबीच टेलिफोन वार्ता भएको छ ।

रास्वपाका अनुसार कुराकानीका क्रममा रुबियोले भोटेकोशी बाढीमा ज्यान गुमाएकाप्रति दुःख व्यक्त गर्दै विपद्को सामना गरिरहेका नेपाल सरकार र नेपाली जनताप्रति अमेरिकाको ऐक्यबद्धता रहेको बताएका छन् ।

जवाफमा लामिछानेले बाढीपछि खोजी, उद्धार र राहतका लागि सरकारले उपलब्ध स्रोतसाधन परिचालन गरिरहेको जानकारी गराएका थिए ।

उनले नेपाली नागरिकसँगै नेपालमा रहेका विदेशी नागरिकको सुरक्षाप्रति पनि सरकार प्रतिबद्ध रहेको रुबियोलाई बताएका थिए ।

विपद्को समयमा अमेरिकाले गरेको सहयोगप्रति लामिछानेले अमेरिकी सरकारलाई धन्यवाद दिएका छन् ।

रुबियोले संकटको यस घडीमा नेपाललाई थप सहयोग गर्न अमेरिका तयार रहेको प्रतिबद्धता व्यक्त गरेको रास्वपाले जनाएको छ ।