चितवन । चितवन कारागारका कैदीबन्दीले भोटेकोशी बाढी प्रभावित परिवारका लागि आर्थिक सहयोगसँगै श्रमदान गरेका छन् ।

कैदीबन्दीले संकलन गरेको रकम र श्रमबाट खरिद तथा निर्माण गरिएका राहत सामग्री सोमबार कारागार परिसरमा प्रमुख जिल्ला अधिकारी गणेश अर्याललाई हस्तान्तरण गरिएको हो ।

उनीहरूले डसना, ब्ल्याङ्केट, तन्ना, सिरानी, सिरानीको खोल, गम्छा, नङकट, साबुन, ब्रस, मञ्जन र काहियोसहित १२५ सेट सामग्री उपलब्ध गराएका छन् ।

सहयोगका लागि कैदीबन्दीले जनही १०० देखि २ हजार रुपैयाँसम्म रकम दिएका थिए । जम्मा ३ लाख ६७ हजार ३६ रुपैयाँ बराबरका सामग्री खरिद गरिएको हो । डसना र सिरानी भने कारागार परिसरमै कैदीबन्दीले श्रमदान गरेर तयार पारेका थिए ।

प्रमुख जिल्ला अधिकारी अर्यालले कैदीबन्दीबाट गरिएको सहयोग उदाहरणीय र नमुना भएको बताए ।

चितवन कारागारमा हाल ७५० कैदीबन्दी छन् । तीमध्ये ७०८ पुरुष र ४२ महिला छन् ।