धनकुटा। धनकुटामा प्रहरीले एक टनभन्दा बढी लागूऔषध गाँजासहित ट्रक नियन्त्रणमा लिएको छ। चेकजाँचका क्रममा ट्रक रोक्न खोज्दा चालक भने प्रहरीलाई छलेर फरार भएका छन्।

साँगुरीगढी गाउँपालिका-७ फेदीस्थित कोशी लोकमार्गमा बुधबार राति भएको चेकजाँचका क्रममा ना.४ ख ५२७ नम्बरको ट्रक नियन्त्रणमा लिइएको जिल्ला प्रहरी कार्यालय धनकुटाले जनाएको छ।

सशस्त्र प्रहरी बल नेपाल विपद् व्यवस्थापन बेस मुलघाटबाट खटिएको टोलीले धनकुटाबाट भेडेटारतर्फ जाँदै गरेको ट्रकलाई रोकेर जाँच गर्न खोजेको थियो। प्रहरीका अनुसार रोक्न संकेत गरेलगत्तै चालकले ट्रकबाट हाम फालेर भागेका थिए।

चालकको गतिविधि शंकास्पद देखिएपछि सशस्त्र प्रहरीले नेपाल प्रहरीको मुलघाटस्थित टोलीलाई खबर गरेको थियो। त्यसपछि संयुक्त रूपमा ट्रकको खानतलासी गर्दा ठूलो परिमाणमा गाँजा फेला परेको हो।

प्रहरीले ट्रकसहित बरामद गाँजा जिल्ला प्रहरी कार्यालय धनकुटामा ल्याएर नापतौल गर्दा कुल १ हजार २४० दशमलव ६ किलोग्राम रहेको पुष्टि भएको जनाएको छ।

सशस्त्र प्रहरी बल नम्बर ६ गुल्म धनकुटाका प्रमुख डीएसपी राजेश फुयलका अनुसार चालक फरार भएपछि ट्रकभित्र गाँजा रहेको खुलेको हो। फरार चालकको पहिचान र खोजी कार्य भइरहेको प्रहरीले जनाएको छ।

कोशी लोकमार्गको धनकुटा खण्ड हुँदै ठूलो परिमाणमा गाँजा ओसारपसार भइरहेको सूचनापछि पछिल्लो समय प्रहरीले निगरानी र चेकजाँच बढाएको जनाएको छ। पछिल्लो बरामदगी पनि सोही निगरानीका क्रममा भएको प्रहरीको भनाइ छ।

एकैपटक एक हजार २४० किलोभन्दा बढी गाँजा बरामद हुनुले धनकुटा हुँदै भइरहेको लागूऔषध ओसारपसारको सञ्जालप्रति समेत प्रहरीले अनुसन्धान अघि बढाउने देखिएको छ।